Քաղաքականություն
22.10.2025 | 11:282025 թվականի օգոստոսի 8-ին ԱՄՆ նախագահ Դոնալդ Թրամփի նախաձեռնությամբ և աջակցությամբ Վաշինգտոնում Ադրբեջանի նախագահն ու ես ընդունեցինք Խաղաղության հռչակագիր, որը, որպես վկա, ստորագրեց նաև ԱՄՆ նախագահ Դոլանդ Թրամփը։ Թբիլիսիում մեկնարկած «Մետաքսի ճանապարհ» 5-րդ համաժողովի ունեցած ելույթում այս մասին հայտարարել է ՀՀ Վարչապետ Նիկոլ Փաշինյանը։
«Հռչակագրի իրականացման հարցում Ադրբեջանը կարևոր քայլ արեց. նախագահ Ալիևը երեկ հայտարարեց, որ Ադրբեջանը վերացնում է իր տարածքով դեպի Հայաստան բեռների տարանցման սահմանափակումները։ Սա չափազանց կարևոր հայտարարություն է, և ուզում եմ իմ գնահատանքն արտահայտել Ադրբեջանի նախագահի այս քայլի առիթով և ողջունել այդ հայտարարությունը։ Տեղի է ունենում ամիսներ առաջ անհավանական թվացող մի բան՝ Ղազախստանից Ադրբեջանով և Վրաստանով ՀՀ է ներմուծվում հացահատիկ։ Սրա համար ուզում եմ գնահատանքիս խոքերն ուղղել նաև Ղազախստանի նախագահին և Վրաստանի վարչապետին»,- նշել է Փաշինյանը։
Նա նաև հավելել է, որ 2023 թվականի հոկտեմբերին ելույթ ունենալով համաժողովին՝ առաջին անգամ ներկայացրել է ՀՀ կառավարության նախաձեռնած «Խաղաղության խաչմերուկ» նախագիծը, որն այնուհետև ստացել է միջազգային գործընկերների հավանությունն ու աջակցությունը։
Նշենք, որ հոկտեմբերի 22-23-ն անցկացվող «Մետաքսի ճանապարհի» հինգերորդ համաժողովին մասնակցում են բարձրաստիճան քաղաքական գործիչներ, բիզնես ոլորտի և միջազգային կազմակերպությունների ներկայացուցիչներ։ Բացման բարձր մակարդակի պանելային քննարկումն անցկացվում է տարածաշրջանի երկրների կառավարությունների ղեկավարների՝ Վրաստանի վարչապետ Իրակլի Կոբախիձեի, ՀՀ վարչապետ Նիկոլ Փաշինյանի և Ադրբեջանի վարչապետ Ալի Ասադովի մասնակցությամբ։
«Մետաքսի ճանապարհ» ֆորումն անցկացվում է երկու տարին մեկ՝ 2015 թվականից ի վեր։ Միջոցառման մասնակիցների թվում են տարածաշրջանի երկրների վարչապետներն ու փոխվարչապետերը, ինչպես նաև տարածաշրջանից դուրս գտնվող երկրների ոլորտային նախարարները, առաջատար համաշխարհային ընկերությունները և միջազգային փորձագետները, Վրաստանում հավատարմագրված դիվանագիտական կորպուսի և միջազգային կազմակերպությունների՝ ՄԱԿ-ի, Համաշխարհային բանկի, Ասիական զարգացման բանկի, Սևծովյան տնտեսական համագործակցության կազմակերպության կազմակերպության ներկայացուցիչներ և այլն։
Նշվում է, որ քննարկումները կկենտրոնանան միջազգային առևտրային և տնտեսական հարաբերությունների, Եվրոպայի և Ասիայի միջև տրանսպորտային և լոգիստիկ կապերի, այդ թվում՝ Միջին միջանցքի դերի և դրա հետագա զարգացման, ինչպես նաև տարբեր արդյունաբերական ոլորտներում նոր ծրագրերի և նախագծերի վրա: Ֆորումն անցկացվում է Invest in Connectivity – Grow in Stability կարգախոսով։
Մանրամասները՝ տեսանյութում։
Եվգենյա Համբարձումյան
