11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Կենսաթոշակների չափերը կբարձրանա՞ն․ հետվճարի առավելագույն չափը 6000 դրամից կդառնա 10000 դրամ
Հասարակություն
21.10.2025 | 22:42
2026 թ․ հունվարի 1-ից անկանխիկ գործարքներից կենսաթոշակառուներին և նպաստառուներին տրամադրվող հետվճարի չափը կբարձրանա՝ 12%-ից հասնելով 20%-ի։ Նախագիծը հանրային քննարկման է ներկայացրել աշխատանքի և սոցիալական հարցերի նախարարությունը։ Հետվճարի առավելագույն չափը 6000 դրամից կդառնա 10000 դրամ։
Ընդգծվում է՝ արդյունքում՝ կենսաթոշակառուների անկանխիկ եղանակով վճարումներից կենսաթոշակառուներին տրամադրվող հետվճարի չափի ավելացման տարբերակով կբարձրանան կենսաթոշակների չափերը:
Նախարարությունից հայտնում են, որ միջոցառումն սկսել է իրականացվել 2022 թվականի հուլիս ամսից։ 2022 թվականին միջին ամսական շահառուների թիվը կազմել է 44,031, իսկ 1 շահառուի գծով հաշվարկված հետվճարի միջին ամսականը՝ 2915 դրամ։ 2025 թվականի օգոստոս ամսին շահառուների թվի միջին ամսականը կազմել է 348,433, իսկ 1 շահառուի գծով հաշվարկված հետվճարի միջին ամսականը՝ 4085 դրամ։ 2025 թվականի հունվար-օգոստոս ամիսների հետվճարի գծով ծախսերը կազմել են 11.8 մլրդ դրամ:
«․․․Հաշվի առնելով միջոցառման արդյունավետությունը՝ նպատակահարմար է անկանխիկ եղանակով վճարումներից կենսաթոշակառուներին հետվճարի տրամադրման միջոցառման ժամկետը երկարաձգել։ Միջոցառման շահառու են հանդիսանում միջոցառման գործողության ընթացքում ապրանքների և (կամ) ծառայությունների ձեռքբերման դիմաց կենսաթոշակային քարտի միջոցով Հայաստանի Հանրապետության տարածքում օրենքով սահմանված կարգով գործող մանրածախ առևտուր իրականացնող և (կամ) ծառայություններ մատուցող սուբյեկտի մոտ տեղադրված ՊՈՍ-տերմինալներով վճարում կատարած կենսաթոշակառուները»,- նշվում է նախագծում։
Նախարարության հաշվարկների համաձայն՝ որոշման նախագծի ընդունման դեպքում անկանխիկ եղանակով վճարումներից կենսաթոշակառուներին հետվճարի հաշվառմամբ կենսաթոշակի միջին ամսական չափը կկազմի շուրջ 56000 դրամ, իսկ միջոցառման շահառուների թիվը կանխատեսվում է 412000 անձ:
Եվգենյա Համբարձումյան
