Սոցիալական տաքսի, կենտրոն տարեցների համար․ ԵՄ աջակցությամբ՝ նոր հնարավորություններ Գորիսում

Աշուղական երգերով և ուրախ տրամադրությամբ Գորիսում ավագ սերնդի կենտրոն է բացում։ Բրգաձև ժայռերի, կարմիր տանիքների և հին պատշգամբների հարևանությամբ տարեցները հաճելի միջավայրում կարող են շփվել, անցկացնել իրենց ժամանցը։ Այս կենտրոնը նաև Արցախից տեղահանվածների համար սովորելու, ստեղծագործելու և միմյանց հետ հաղորդակցվելու վայր է։

Լյուդմիլա Սարգսյանը 2023 թվականին Արցախից բռնի տեղահանվածներից է։ Ասում է՝ կենտրոն գալը օգնում է կտրվել առօրյա հոգսերից, սակայն զրույցի թեման չի փոխվում։  

Շահառուները կենտրոնում փորձարկում են խմորեղենի պատրաստման սեփական բաղադրատոմսերը, զբաղվում ասեղնագործությամբ, գորգագործությամբ։ Կենտրոնն առաջարկում է նաև այցելություններ թանգարաններ, թատրոններ, յոգայի բացօթյա դասեր է կազմակերպում։ 

Նախագծում ներգրավված է մոտ 100 տարեց, որոնց մեծ մասը Արցախից տեղահանված և միայնակ տարեցներ են։ Ծրագիրն իրագործող ՎԻՆՆԵԹ Գորիս զարգացման  հիմնադրամի տնօրենն ասում է՝ բոլորին միաժամանակ հնարավոր չէ մի տարածքի մեջ տեղավորել, դրա համար նախատեսվել են տարբեր պարապմունքներ և ժամանցային միջոցառումներ՝ ըստ գրաֆիկների։ 

Կենտրոնը հիմնադրվել է ԵՄ ֆինանսավորմամբ և ՀՀ-ում Գերմանիայի Դաշնային Հանրապետության դեսպանության աջակցությամբ։ Պլանավորվում է վերանորոգել ատամնաբուժական կաբինետը և չրերի արտադրամասը։ Երկրորդ հարկում կվերանորոգվեն 10 սենյակներ, որոնք հարմարեցված կլինեն գրասենյակների, գիշերակացի, դասախոսությունների դահլիճի, գրադարանի և բժշկական սենյակի համար։ 

Քրիստինե Խաչունցը մանկական ուղեղային կաթվածով է ծնվել, 2022 թվականից գալիս է «Սանտե Արմենի» մեծերի վերականգնողական կենտրոն։ Սոցիալական տաքսի ծառայության ներդրումից ի վեր նա անվճար տեղաշարժվում է՝ հատուկ հարմարեցված մեքենայով։ 

Ծառայության ծրագրում ներառված են Գորիս, Տեղ, Տաթև համայնքների հաշմանդամություն ունեցող անձինք։ Այն ուղղված է հաշմանդամություն ունեցող անձանց տեղաշարժման ապահովմանը և կյանքի որակի բարելավմանը։ 

ԵՄ աջակցությամբ գործող այս ծառայությունը ապահովում է, որ առողջապահական և վերականգնողական հիմնական ծառայությունները հասանելի լինեն Գորիս խոշորացված համայնքի յուրաքանչյուր բնակչի։

Սրանք ընդամենը մի քանիսն են Սյունիքում իրականացվող և իրականացված  ավելի քան չորս տասնյակ ծրագրերից, որոնք մաս են կազմում «Դիմակայուն Սյունիք թիմ Եվրոպա նախաձեռնության»։ Նախաձեռնության անդամները երկօրյա այցով այցելել էին Սյունիք՝ ծանոթանալու ԵՄ անդամ երկրների և միջազգային այլ գործընկերների աջակցությամբ մարզում իրականացվող ծրագրերին։ Ծրագրի 5 տարվա բյուջեն շուրջ 200 մլն եվրո է, որից 65 մլն դրամաշնորհային, իսկ 135 մլն՝ վարկային միջոցներ են։

Մանրամասները՝ տեսանյութում։

Անի Թամրազյան