Մասնակցելու եմ Տեր Արամ քահանա Ասատրյանի կողմից մատուցվող պատարագին․ Փաշինյան

Առաջիկա կիրակի օրը, հոկտեմբերի 26-ին, Հովհաննավանքում,  մասնակցելու եմ Տեր Արամ քահանա Ասատրյանի կողմից մատուցվող Սուրբ և Անմահ Պատարագին։ Այս մասին հայտարարել է վարչապետ Նիկոլ Փաշինյանը։

Տեր Արամ քահանա Ասատրյանը, որն այսօր կարգալույծ է արվել, և ըստ Մայր Աթոռի պետք է դասվի աշխարհականների շարքին Ստեփան Ասատրյան ավազանի անունով, հայտարարել էր, որ շարունակելու է մնալ Հովհաննավանքում։

Նա նաև հայտարարություն է տարածել ու կիրակի օրը հավատացյալներին հրավիրել է Հովհաննավանք` մասնակցելու Սուրբ և Անմահ Պատարագին, որը մատուցելու է ինքը։

««Ցավոք ոչ առաջինն եմ և ոչ էլ վերջինը կլինեմ»

Հայտնի ձայնագրության մեջ Ամենայն Հայոց Կաթողիկոսի նախկին գավազանակիրը Կարգապահական հանձնախմբի նախագահի հետ իր խոսքն ավարտում է այս կարևոր հայտարարությամբ, որն այսօր առավել քան արդիական է և ես էլ վերջինը չեմ լինի ցավոք։

Այսօր առավոտյան Կարգապահական հանձնախմբին եմ ներկայացրել նամակ, որով պատրաստակամություն եմ հայտնել հանդիպելու Հանձնախմբի հետ (մինչ այդ շուրջ մեկ ամիս խնդրել եմ ինձ ներկայացնել Հանձնախմբի հետ հանդիպելու նպատակը) և իմ նամակը ստանալուց հետո հրապարակվում է հայտնի «տնօրինության» որոշումը։

Երանի թե նույն արագությամբ պատասխանեին, թե ինչու Հանձնախումբը նվազագույնը երկու տարի չի արձագանքել Կաթողիկոսի կարգապահական խնդրահարույց ընթացքին։

Այժմ ունենք այն, ինչ ունենք։

Սիրելի Օհանավան և Ուշի համայնքների հավատացյալ հայորդիներ և հազարավոր քրիստոնյաներ, հանուն ճշմարտության հաղթանակի մեր այս նախաձեռնությունը մենք արդար ճանապարհով կպսկենք հաջողության հաստատագրումով։ Աստված մեզ հետ է, և ազատարար ճշմարտությունը շուտով, շատ շուտով հայտնի կդառնա»,-նշել է նա։