19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Ալիևը, այսպես կոչված, «Զանգեզուրի միջանցքի» բացումը կանխատեսում է 2028 թվականի վերջին
Քաղաքականություն
21.10.2025 | 14:25
«Զանգեզուրի միջանցքի բացումը կարող է տեղի ունենալ 2028 թվականի վերջին»,- հայտարարել է Ադրբեջանի նախագահ Իլհամ Ալիևը Ղազախստանի նախագահ Կասիմ-Ժոմարտ Տոկաևի հետ մամուլի ասուլիսում։
«Բացի այն, որ մենք այժմ ամեն ինչ ծրագրում և իրականացնում ենք, Զանգեզուրի միջանցքի նախագիծը նույնպես հսկայական ներուժ ունի։ Ադրբեջանի տարածքում բոլոր ճանապարհային և երկաթուղային կապերը կավարտվեն հաջորդ տարվա կեսերին։ Մենք հույս ունենք, որ այս նույն արագությամբ կիրականացվի նաև այլ երկրների տարածքում, և այդ դեպքում Զանգեզուրի միջանցքի բացումը կարող է տեղի ունենալ 2028 թվականի վերջին»,- ասել է Ալիևը։
Ադրբեջանի նախագահն իր խոսքում անդրադարձել է նաև TRIPP-ին։
«Օգոստոսին Վաշինգտոնում կայացած գագաթնաժողովի ձեռքբերումներից մեկը TRIPP (Trump Route for International Peace and Prosperity) նախագիծն էր։ Նախագահ Թրամփն իր անունը տվել է այս նախագծին, ինչը, բնականաբար, խոսում է այն մասին, որ այն անպայման կիրականացվի։ Այդպիսով, Միջին միջանցքի երկայնքով բացվում է ևս մեկ երթուղի։ Ավանդական երթուղուց բացի՝ ի հայտ է գալիս ևս մեկը՝ Զանգեզուրի միջով, 15 միլիոն տոննա բեռնաշրջանառությամբ, որը համապատասխանում է ժամանակակից չափանիշներին։ Այսպիսով, Ասիայից Եվրոպա և հետ մեր երկրների միջով բեռնափոխադրումների ծավալն ինքնին աճի ներուժ ունի, բայց նաև կունենա ավելի մեծ ներուժ ընդունման և ուղարկման համար»,- նշել է նա։
Հավելենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, այդ թվում՝ նախագահ Իլհամ Ալիևը շարունակում են «միջանցք» եզրույթն օգտագործել՝ խեղաթյուրելով նաև ստորագրված փաստաթղթերի բովանդակությունը։
Թարգմանությունը՝ Էմմա Չոբանյանի
