«Սամվել հոպարի Գևորիկի կազմակերպած» հավաքին  գումարով մասնակցելու գործով մեղադրյալներ չկան

Գումարի դիմաց հավաքի մասնակցելու ձայնագրության առթիվ Քննչական կոմիտեում նախաձեռնված քրեական վարույթի շրջանակներում մեղադրյալ չկա։

«Նախաձեռնված քրեական վարույթի շրջանակներում որևէ անձի նկատմամբ դեռևս չի հարուցվել հանրային քրեական հետապնդում»,- Factor TV-ի հարցին ի պատասխան ասաց Քննչական կամիտեի նախագահի մամուլի քարտուղար Կիմա Ավդալյանը։

Հիշեցնենք, որ մամուլում հայտնվել են ձայնագրություններ, որոնցում խոսակցություններ են հավաքին առերևույթ գումարի դիմաց մասնակցելու վերաբերյալ։ Կիմա Ավդալյանը Factor TV-ին երեկ հայտնել է, որ ձայնագրությունների առթիվ վարույթ է նախաձեռնվել Քրեական օրենսգրքի 236-րդ հոդվածի 2-րդ մասի հատկանիշներով, այսինքն՝ հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը):

Համացանցում առկա ձայնագրություններից մեկում զրուցակիցներից մեկը մյուսին 20 000 դրամ աշխատելու տարբերակ է առաջարկում։ 

-«Իջնում ես քաղաք, մեր Գևորիկն ա կազմակերպում։ 

-Ի՞նչ Գևորիկ։ – Մեր Սամվել հոպարի։ Երթ ա։ Ընդեղ, մի մոմենտ երևա։
-Ապեր, հորս արև, ասա 5 հոգի բերում է, թող 100 հզ տա։
-10 000 ա, ես եմ ասել 20 000 տուր, հորս արև, տենց չի լինի։
-Ասա 10 հոգի բերում ա։
– Հենց հիմա բեր, հորս արև, 100 000 տա, շան տղա ըլնեմ, ասեմ, հանի, դնի ջեբդ։ 

-10 հոգի՞։ 

-Արա, ինչքան բերեց, հանի, դնի ջեբդ, էթալու ա ընդեղ՝ Արամ Խաչատրյանի արձանի մոտ։ -Չէ, էթանք Շինարարներ։
-Ախպերս, իջեք Արամ Խաչատրյան, ինքը ընդեղ ա, ասեմ հաշվի, տա ձեռդ՝ առանձին քեզի։ -Չէ, դե տենց կբռնվենք, թող գա, 100 հզ տա, 10 հոգի վեկալեմ, գնանք։
-Մի ժամից ա, 4-ին պիտի ընդեղ լինեն։
-Աղջիկ-մաղջիկ կլինի չէ՞։
-Տատի-աղջիկ, ինչ ուզում ա լինի, մի հոգին 10 000։
-Դե զանգի, ասա էսա ղրգում ա։ Ասա Հակոբը էսա 10 հոգի ղրգում ա, 100-ը գա վեկալի»,- լսելի է ձայնագրության մեջ։

Ձայնագրությունների հրապարակմանը և ՔԿ-ի կողմից վարույթ նախաձեռնելուն ավելի ուշ արձագանքել է «Մեր ձևով» շարժման խոսնակը։  Մարիանա Ղահրամանյանը ֆեյսբուքյան էջում հակիրճ գրառում է արել․ «Ենթադրաբար, ԱԱԾ սպա Գևորիկը հանձնարարությունը լավ չի կատարել ու չի խոսում Տաշիրի բարբառով»։ 

Արաքս Մամուլյան