06.08.2026 | 15:09
Արենի համայնքին կհատուցվի 2.2 միլիոն դրամ. Դատախազության՝ պետշահերի հայցը բավարարվել է
ՀՀ-ի և Ադրբեջանի միջև խաղաղության պայմանագրի ստորագրումը տարածաշրջանում կայունության, գործակցության նոր դարաշրջան կբացի. Արաղչի
Քաղաքականություն
21.10.2025 | 13:57
Իրանի արտգործնախարար Աբբաս Արաղչին Թեհրանում Ադրբեջանի նախագահ Իլհամ Ալիևի հատուկ օգնական Խալաֆ Խալաֆովի հետ հանդիպմանը վերահաստատել է Իսլամական Հանրապետության սկզբունքային դիրքորոշումը, որ Հարավային Կովկասում խաղաղությունն ու կայունությունը կենսական նշանակություն ունեն տարածաշրջանը բնակեցնող բոլոր ազգերի համար, գրում է Mehr գործակալությունը։
Իրանական կողմի հաղորդմամբ՝ պաշտոնյաները քննարկել են երկկողմ համագործակցության ընթացքը, Հարավային Կովկասում տարածաշրջանային կայունությունը և տարբեր ռազմավարական ոլորտներում ապագա համագործակցության առկա հեռանկարները։
Արաղչին կրկնել է Թեհրանի դիրքորոշումը՝ հարգել երկրների ինքնիշխանությունն ու տարածքային ամբողջականությունը, մերժել տարածաշրջանում ցանկացած աշխարհաքաղաքական փոփոխություն և դիվանագիտությունը սահմանել որպես վեճերի լուծման միակ միջոց։
Իրանի արտաքին գործերի նախարարը հույս է հայտնել նաև, որ Հայաստանի և Ադրբեջանի միջև խաղաղության պայմանագրի ստորագրումը տարածաշրջանում կայունության և համագործակցության նոր դարաշրջան կբացի։
Թարգմանությունը՝ Էմմա Չոբանյանի
