15.07.2026 | 10:11
Իսպանիայի հավաքականը կրկնեց Իտալիայի անպարտելիության ռեկորդը
Զեմֆիրան, TikTok-ում Փաշինյանի 3 մլն դիտում ունեցող տեսանյութն ու կրեմլամերձ Mash․ru-ի կեղծ պնդումը
Քաղաքականություն
21.10.2025 | 22:30
Հայկական մի շարք լրատվամիջոցներ հոկտեմբերի 20-ին գրեցին, որ երգչուհի Զեմֆիրան հրաժարվել է գալ Հայաստան հյուրախաղերի՝ վախենալով ձերբակալությունից։ Լուրի սկզբնաղբյուրը Mash.ru-ն է, որը պնդում է, թե կազմակերպիչները արտիստի հետ սկսել էին բանակցել ՀՀ վարչապետ Նիկոլ Փաշինյանի` սոցցանցներում մեծ տարածում գտած հայտնի տեսանյութից հետո։ Տեսանյութում Փաշինյանը պարզապես նստած է իր աշխատասենյակում և Զեմֆիրայի երգերից մեկն է լսում։ Այդ կարճ տեսանյութը շուրջ 3 միլիոն դիտում ունի TikTok-ում։
«․․․Իվենթ-ընկերությունները շտապել էին համոզել երգչուհուն՝ Երևանում համերգներ տալ և անգամ ելույթներ ունենալ կորպորատիվների ժամանակ։ Զեմֆիրային առաջարկվել է 20 միլիոն ռուբլի և պատրաստ էին վճարել ավելին։ Սակայն Զեմֆիրան կտրականապես հրաժարվել է գալ Երևան։ Նա շատ է վախենում, որ Ռուսաստանի համար բարեկամական երկրում (ՀՀ-ում-խմբ․) կարող են իրեն կալանավորել, քանի որ նա բազմիցս հրապարակային կերպով քննադատել է ՌԴ բանակը և աջակցել Ուկրաինային»,- նշում է Mash.ru-ն։
Պարզվում է՝ Mash-ում ամռանը նորություններ չեն կարդացել, որովհետև հպանցիկ հայացքն այդ օրերի լրահոսին կբացահայտեր վերոնշյալ պնդման զավեշտալի լինելը։
Բանն այն է, որ հուլիսի 4-ին Զեմֆիրան մենահամերգ է ունեցել Երևանում, Հրազդան մարզադաշտում։ Ավելին, երգչուհին համերգից հետո ինստագրամյան իր էջում գրառում է արել՝ խոստովանել, որ Երևանը զարմացրել է իրեն. «Այնքան ջերմություն։ Զարմանալի երկիր, զարմանալի մարդիկ։ Երեք օրն էլ գլխումս հարցն էր՝ «ինչպե՞ս է պատահել, որ ես երբեք այստեղ չեմ եղել»։ Իմ տարիքում նման «հայտնագործություններ» անելն անգնահատելի է։ Իմ սրտի մի մասը մնաց այնտեղ՝ Երևանում»։
Հատկանշական է, որ անգամ Mash-ի հոկտեմբերի 20-ի լուրը տարածած կայքերն ավելի վաղ տեղադրել են նաև Զեմֆիրայի ինստագրամյան գրառումը։
Հիշեցնենք՝ Զեմֆիրային ՌԴ-ում «արտասահմանյան գործակալ» են ճանաչել դեռևս 2023 թվականի փետրվարի 10-ին։ Ռուսաստանի արդարադատության նախարարության մամուլի հաղորդագրության համաձայն՝ Զեմֆիրան «բացահայտորեն հանդես է եկել Ուկրաինային աջակցությամբ, հանդես է եկել համերգներով թշնամական երկրներում՝ հատուկ ռազմական գործողության դեմ կոչերով, և ստացել է աջակցություն օտարերկրյա աղբյուրներից»։
Նշենք, որ Mash.ru-ի գործունեությունը կապվում է ՌԴ իշխանությունների հետ։ 2018 թվականի նոյեմբերին Проект-ը Mash-ի գործունեությունը կապել էր ռուս գործարար, ՌԴ նախագահ Վլադիմիր Պուտինի ընկեր Յուրի Կովալչուկի հետ՝ նշելով, որ լրատվականը նրան է անցել ռուս լրագրող Արամ Գաբրելյանովի հետ համագործակցությունը դադարեցնելուց հետո։ Այդ պահից սկսած ալիքի գործունեությունը ղեկավարվում էր «Ազգային մեդիա խմբի» նախագահի՝ Կիրիլ Կովալչուկի որդու և նրա մեկ այլ ազգականի կողմից։
The Insider-ի տվյալներով՝ Mash-ի նախկին գլխավոր խմբագիրը, տնօրենը և համասեփականատերը՝ Մաքսիմ Իքսանովը, բնակվել է Մոսկվայում գտնվող բնակարաններից մեկում, որը պատկանում է ՌԴ նախագահի գործերի կառավարման վարչությանը։ Տունը ձևակերպված է նրա հոր՝ Տահիր Իքսանովի անունով, որը նախկինում զբաղեցրել է Մեծ թատրոնի տնօրենի պաշտոնը։
Եվգենյա Համբարձումյան
