Հովիկ Աղազարյանն ու Հակոբ Ասլանյանը չեն խոչընդոտելու իմփիչմենթի գործընթացին․ Մամիջանյան․ ՏԵՍԱՆՅՈՒԹ

Խորհրդարանը քննարկում է  ընդդիմադիր «Պատիվ ունեմ» խմբակցությունը «Ազգային ճգնաժամի, կառավարման ձախողման հիմքերով ՀՀ վարչապետին անվստահություն հայտնելու մասին» Ազգային ժողովի հայտարարության նախագիծը։

Խմբակցության ղեկավար Հայկ Մամիջանյանը, ներկայացնելով նախագիծը, շեշտեց, որ  նշել էր, որ դրա նպատակը իշխանության նկատմամբ իմփիչմենթին հասնելն է։

Մամիջանյանի խոսքով՝ իրենք իմփիչմենթի հարցով քննարկում են ունեցել ՔՊ-ից հեռացված պատգամավորներ Հովիկ Աղազարյանի և Հակոբ Ասլանյանի հետ, իսկ նրանք փոխանցել են, որ չեն խոչընդոտելու իմփիչմենթի գործընթացին։

Նշենք, որ ԱԺ պետաիրավական հանձնաժողովի նիստում ընդդիմությանը նախագիծը բացասական եզրակացություն էր ստացել։

«Նիկոլ Փաշինյանի ղեկավարած կառավարությունը ոչ միայն չի կատարել իր պարտականությունները՝ էականորեն շեղվելով իր իսկ ներկայացրած և խորհրդարանական մեծամասնության հավանությանն արժանացած կառավարության ծրագրից, այլև չի կարողացել արդյունավետորեն արձագանքել պետության առջև ծառացած մարտահրավերներին՝ հաճախ դառնալով նոր մարտահրավերների առաջացման պատճառ։ Այսօրվա կառավարիչների գործունեությունը հանգեցրել է համակարգային ճգնաժամի պետական կառավարման բոլոր մակարդակներում: Այդ քաղաքականությունն աղետալի հետևանքներ է ունեցել ազգային անվտանգության, պետական ինքնիշխանության, ժողովրդավարության, սոցիալ-տնտեսական և ազգային կյանքի բոլոր ոլորտներում, լրջագույն խնդիրներ առաջացնելով Հայաստանի Հանրապետության համար՝ վտանգի տակ դնելով նաև երկրի ապագան»,-ասված է նախագծում։

Մանրամասները՝ տեսանյութում։

Մանյա Պողոսյան