Պուտինը և Ալիևը ինչքան էլ հաշտվեն, համբուրվեն, Ադրբեջանը հակառուսական կլինի․պանթուրքիստական ուժ է, ՌԴ-ի դեմ է․ Արա Պապյան. ՏԵՍԱՆՅՈՒԹ

Ուկրաինայի նախագահ Զելենսկին հայտարարել է, որ պատրաստ է սկսել խաղաղության բանակցություններ և Բուդապեշտում կայանալիք գագաթնաժողովի ժամանակ կհանդիպի ՌԴ-ի նախագահ Պուտինի և ԱՄՆ նախագահ Թրամփի հետ։ «Ես վստահ չեմ, որ Պուտինը պատրաստ է ավարտել այս պատերազմը», – ասել է Ուկրաինայի նախագահը NBC-ի հետ հարցազրույցի ժամանակ: Զելենսկին կոչ է արել լրացուցիչ ճնշում գործադրել Ռուսաստանի առաջնորդի վրա՝ ասելով, թե Պուտինը «վախենում է պատժամիջոցներից»: Թրամփը և Պուտինը պատրաստվում են հանդիպել Հունգարիայում՝ Ուկրաինայի հարցով բանակցություններ վարելու։ «Կարծում եմ՝ նախագահ Պուտինը ցանկանում է ավարտել պատերազմը․․․ Նախագահ Զելենսկին էլ է ցանկանում, որ պատերազմն ավարտվի։ Մնում է իրականացնենք դա»,- ասել է Թրամփը։
ԱԺԲ խորհրդի անդամ, դիվանագետ Արա Պապյանը Factor TV-ի հետ զրույցում ասում է, որ Պուտինը, մեծ հավանականությամբ, չի դադարեցնի պատերազմը, քանի որ դա ներքին խժդժություններ կբերի ՌԴ-ի ներսում՝ անգամ իշխանափոխության վտանգ կարող է լինել։ Պապյանը համարում է, որ Արևմուտքը չի գնա ՌԴ-ի փլուզման, այլ՝ կնախընտրի չեզոքացնել նրանից վտանգը։ Դիվանագետը համարում է, որ ՌԴ-ն թուլանում է նաև մեր ռեգիոնում․

«Պուտինը պատերազմը չի կանգնեցնի, ՌԴ-ն պիտի՛ հաշտվի, որ կայսրություն չի լինելու։ ՌԴ-ն թուլացել է, հեռանում է ռեգիոնից, Արևմուտքին պիտի բերենք, որ թուրքերի հետ մենակ չմնանք։ Թուրքիան վտանգ է մեզ համար, ՀՀ իշխանությունն ինչ էլ ասի՝ թուրքերը մեզ թշնամի են տեսնում, ոչ՝ գործընկեր։ ՌԴ-ն սխալ հաշվարկեց, որ Ադրբեջանը ՀՀ-ից կարևոր է, եթե հայերին աջակցեր, ՀՀ-ն իրեն հավատարիմ կլիներ։ Պուտինը և Ալիևը ինչքան էլ հաշտվեն, համբուրվեն, Ադրբեջանը հակառուսական կլինի․ պանթուրքիստական ուժ է, ՌԴ-ի դեմ է»,- ասաց Արա Պապյանը։

Հաղորդումն ամբողջությամբ՝ տեսանյութում։

Ռոբերտ Անանյան