Վրաստանի ընդդիմադիր ուժերից մեկը դադարեցնում է բոյկոտը և վերադառնում խորհրդարան

«Գախարիան՝ Վրաստանի համար» կուսակցությունը որոշել է դադարեցնել խորհրդարանի  բոյկոտը և անցնել պատգամավորական գործունեության։ Այս մասին հայտարարել է կուսակցության քաղաքական խորհրդի անդամ Գիորգի Շարաշիձեն։

Նրա խոսքով՝ խորհրդարանի աշխատանքներին և մունիցիպալ ժողովներին մասնակցելուց հրաժարվելը ոչ միայն սխալ էր, այլև «հանցագործություն երկրի և ժողովրդի դեմ»։

«Մեկ տարի առաջ՝ հոկտեմբերի 26-ի խորհրդարանական ընտրություններից հետո, մեր թիմը միաձայն որոշեց բոյկոտել խորհրդարանը։ Ցավոք, այսօր մենք ստիպված ենք ընդունել, որ քաղաքական բողոքի այս ձևը չկարողացավ կանգնեցնել իշխող «Վրացական երազանք» կուսակցության «չար մեքենան»։ Այն չկարողացավ կանխել փաստացի իշխանությունների կողմից կործանարար որոշումների կայացումը, ինչպիսիք են եվրաինտեգրման գործընթացը կասեցնելը, հակաժողովրդավարական օրենքներ ընդունելը, մարդու իրավունքների ոտնահարումը, ավտոկրատիայի ամրապնդումը, խաղաղ քաղաքացիների նկատմամբ բռնությունը, ազատ և արդար ընտրությունների գողությունը և բազմաթիվ այլ հանցավոր, հակաազգային և հակապետական ​​գործողություններ»,- հայտարարել է Շարաշիձեն։

Նա նշել է, որ խորհրդարանի բոյկոտը, որը վերաճել է ամբողջ քաղաքական գործընթացի բոյկոտի, փաստորեն մեկուսացրել է ընդդիմությանը քաղաքական ասպարեզից: Արդյունքում, ըստ նրա, «Վրացական երազանքը» հնարավորություն է ստացել առանց դիմադրության ամրապնդել ավտորիտարիզմը:

Ավելի վաղ խորհրդարանը կասեցրել էր Վրաստանի նախկին վարչապետ Գիորգի Գախարիայի և նրա կուսակցության 11 այլ անդամների լիազորությունները՝ հաստատելով հաջորդ կուսակցական ցուցակի 12 նոր պատգամավորների մանդատները։

Խորհրդարանում կաշխատեն Գելա Աբուլաձեն, Ջեմալ Անանիձեն, Քեթևան Բաքրաձեն, Ռուսուդան Թևզաձեն, Մալխազ Տորիան, Շալվա Կերեսելիձեն, Սալոմե Կոբալաձեն, Գիգա Պարուլավան, Վիկա Պիլպանին, Գիորգի Շարաշիձեն, Թամար Խվեդելիանին և Սոփո Խորգուանին։

Ինքը՝ Գախարիան, քրեական հետապնդման սպառնալիքի տակ է և Գերմանիայից չի վերադառնում Վրաստան։

Կենտրոնական ընտրական հանձնաժողովի արդյունքների հիման վրա խորհրդարան մտած մյուս ընդդիմադիր կուսակցությունները չեղյալ էին հայտարարել իրենց կուսակցական ցուցակները և չեն իրացրել իրենց մանդատները։ Նրանք պնդում են, որ ընտրությունների արդյունքները կեղծվել են։

Թարգմանությունը՝ Էմմա Չոբանյանի