Նամակ ենք գրել Մհեր Գրիգորյանին, թող մեր խնդիրը լուծեն. բեռնափոխադրող վարորդ․ ՏԵՍԱՆՅՈՒԹ

Բեռնատարների վարորդները կրկին բողոքի ակցիա են իրականացնում կառավարության շենքի առջև: Նրանք պահանջում են, որ կառավարությունը ռուսական կողմի հետ բանակցի 90-օրվա սահմանափակումը հանելու վերաբերյալ:

Հայաստանից դեպի Ռուսաստանի Դաշնություն բեռնափոխադրումներ իրականացնող վարորդներից մեկը լրագրողների հետ զրույցում տեղեկացրեց, որ պատրաստվում են նամակ փոխանցել փոխվարչապետ Մհեր Գրիգորյանին, որպեսզի նաև առաջիկայում ԵՏՄ նիստում բարձրաձայնի իրենց խնդիրը։

«ՌԴ մեկնելու և այնտեղ մնալու իմ 90 օրն արդեն սպառվել է։ Եթե գնամ իմ մուտքը կարող է 3-5 տարի արգելվել։ Այս խնդիրը բոլոր բեռնափոխադրողներին է սպասվում, հիմա որ վարորդը գալիս է Հայաստան, այլևս չի կարողանում հետ գնալ։ Բեռ էլ չենք կարա բերել անտեղից, մեր հարցին պիտի լուծում տրվի»,-ասաց բեռնափոխադրում իրականացնող վարորդը։

Հիշեցնենք, որ այս տարվա հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով, օրացույցային տարվա ընթացքում կարող են մնալ 90 օր նախկին 180 օրվա փոխարեն։

Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։ Կառավարության շենքի դիմաց հավաքված վարորդները պնդում են, որ 90 օրը քիչ է, որովհետև թույլատրելի ժամկետի մեծ մասն իրենք կարող են անցկացնել, օրինակ, Վլադիկավկազում կամ Վերին Լարսում հերթերի մեջ։ Բողոքի ակցիա իրականացնող վարորդները պահանջում են, որպեսզի ՌԴ նոր միգրացիոն փոփոխությունը Հայաստանին չվերաբերի։

Նշենք, որ նախորդ շաբաթ վարորդները ևս բողոքի ակցիա են իրականացրել կառավարության շենքի դիմաց։ Էկոնոմիկայի նախարար Գևորգ Պապոյանը զրուցել էր նրանց հետ և ասել, որ զբաղվում են այս խնդրով: Նախարարը, սակայն, ժամկետներ չէր նշել, թե երբ կարող է խնդիրը լուծվել։ Նախորդ շաբաթ բեռնափոխադրումներ իրականացնող վարորդները նաև նամակ- դիմում էին փոխանցել կառավարություն, սակայն, մինչև այս նրանց գործադիրից չեն պատասխանել։

Մանրամասները՝ տեսանյութում։