ՀՀ-ն կարող է ԵՄ անդամակցության հայտ ներկայացնել հաջորդ ամիս, գուցե նաև հաջորդ տարի. դա մեր պաշտոնական քաղաքականությունն է․ Միրզոյան

ՀՀ արտաքին գործերի նախարար Արարատ Միրզոյանը Deutsche Welle-ին տված հարցազրույցում, ի թիվս այլ հարցադրումների, պատասխանել է նաև այն հարցին, թե  Հայաստանը երբ է պատրաստվում ԵՄ-ին անդամակցության պաշտոնական դիմում ներկայացնել։

«Մենք օրենք ունենք, Ազգային ժողովն իրավական ակտ է ընդունել, որը պարտավորեցնում է Կառավարությանը ձգտել ԵՄ անդամակցության։ Չեմ կարող ճշգրիտ ասել, թե երբ կներկայացնենք դիմումը։ Դա կարող է լինել հաջորդ ամիս, կարող է լինել նաև հաջորդ տարի։ Դա կախված է բազմաթիվ գործոններից։ Բայց, ինչպես արդեն ասացի, սա մեր պաշտոնական քաղաքականությունն է», – ասել է Միրզոյանն ու նշել, որ մինչ անդամակցության դիմում տալն ու ԵՄ-ից պատասխանի սպասելը, Երևանն ակտիվորեն սկսել է համագործակցել ԵՄ մարմինների հետ և արդեն իսկ խորացրել է երկկողմ հարաբերությունները։

«Երկու երկրների միջև գործում է Համապարփակ և ընդլայնված գործընկերության համաձայնագիրը (CEPA), և արդեն իսկ սկսել ենք վիզաների դյուրացման գործընթացը, և կարծում եմ, որ այն լավ է ընթանում։ Հայաստանն ու Բրյուսելը ներկայում համակարգում են մի շարք նոր փաստաթղթեր և ավարտել են գործընկերության նոր ծրագիրը, որը նախատեսվում է ստորագրել առաջիկա երեք ամիսների ընթացքում»,- հավելել է Հայաստանի արտգործնախարարը։

Ապա Միրզոյանը նկատել է, որ «ՀՀ-ի և ԵՄ-ի միջև շատ բաներ են տեղի ունենում, և դա նույնպես հետաքրքիր է ընդգծել․ մենք տեսնում ենք, որ ՀՀ քաղաքացիները մեզանից պահանջում են առաջ շարժվել։ Մենք լսում ենք նրանցից որոշ քննադատություններ հնարավոր ուշացումների և երկարատև ընթացակարգերի վերաբերյալ»։

ԵՄ-ի հետ վիզային ռեժիմի չեղարկման մասին հարցին Միրզոյանը պատասխանել է, որ իրատեսական ժամկետ է համարում մեկից երկու տարին։

«Իսկ հիմա եկեք խոսենք «Սենյակում մեծ սպիտակ փղից՝ Ռուսաստանից»։ Ինչպե՞ս է Մոսկվան արձագանքում ԵՄ-ի հետ ձեր համագործակցությանը։ Դա նրան դուր չի գալիս, այնպես չէ՞»՝ հարցին Միրզոյանը պատասխանել է․ «Միգուցե, ես դա չեմ բացառում»։

Թարգմանությունը՝ Անահիտ Խաչատրյանի