28.06.2026 | 22:27
Արման Թաթոյանի հրապարակած 2 ձայնագրությունների մասով վարույթ կա, մեղադրյալ չկա․ ՏԵՍԱՆՅՈւԹ
Տիգրան Ավինյանն առաջարկում է Մարկ Գրիգորյանին, Ավիկ Իսահակյանին ու Տարոն Մուրադյանին շնորհել «Երևանի պատվավոր քաղաքացի» կոչում
Քաղաքականություն
17.10.2025 | 18:45
Երևանի ավագանին հոկտեմբերի 23-ին նիստ կգումարի։ Օրակարգում այս պահին ընդգրկված է 25 հարց, որոնցից միայն 6-ն է զեկուցվող։
Նիստում քննարկվելու է երեք հայտնի անձանց՝ Մարկ Գրիգորյանին, Ավետիք (Ավիկ) Իսահակյանին և Տարոն Մուրադյանին «Երևանի պատվավոր քաղաքացի» կոչում շնորհելու հարցը։
«Հաշվի առնելով լրագրող, մանկավարժ, հասարակական և մշակութային գործիչ Մարկ Գրիգորյանի ներդրած նշանակալի ավանդը Երևան քաղաքի հասարակական և մշակութային կյանքում՝ առաջարկվում է նրան շնորհել «Երևանի պատվավոր քաղաքացի» կոչում և Երևան քաղաքի ավագանու քննարկմանն է ներկայացվում սույն որոշման նախագիծը»,- նշված է որոշման նախագծում։
Մեկ այլ նախագծով առաջարկվում է «Երևանի պատվավոր քաղաքացի» կոչում շնորհել գրականագետ, բանասիրական գիտությունների դոկտոր, պրոֆեսոր, ՀՀ արվեստի վաստակավոր գործիչ Ավետիք (Ավիկ) Իսահակյանին՝ Երևան քաղաքի արվեստի զարգացման գործում ներդրած նշանակալի ավանդի համար։
Երևանի քաղաքապետ Տիգրան Ավինյանն առաջարկում է «Երևանի պատվավոր քաղաքացի» կոչում շնորհել նաև նկարիչ Տարոն Մուրադյանին՝ Երևան քաղաքի արվեստի զարգացման գործում ներդրած նշանակալի ավանդի համար։
Գրիգորյանին, Իսահակյանին ու Մուրադյանին «Երևանի պատվավոր քաղաքացի» կոչում կշնորհվի, եթե ավագանին կողմ քվեարկի որոշման նախագծերին։
Արփի Հակոբյան
