Հայտնի է մեղուների զանգվածային անկումների պատճառը

ՍԱՏՄ-ն պարզել է հանրապետության տարբեր շրջաններում մեղուների անկման պատճառը։ Տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը Factor.am-ի հետ զրույցում հայտնեց, որ Սյունիքի մարզի 20 և Վայոց ձորի մարզի 1 բնակավայրերում անկած մեղվաընտանիքներից լաբորատոր փորձաքննության արդյունքում հայտնաբերվել են մի շարք սնկային, ինչպես նաև մակաբուծային՝ վարրոատոզ, նոզեմատոզ և ամեբիազ հիվանդությունների հարուցիչներ:  

«Հանրապետության երկու մարզերի մեղվաբույծներից մեղվաընտանիքների անկման դեպքերի վերաբերյալ ահազանգեր ստանալուց հետո սննդամթերքի անվտանգության տեսչական մարմինը կայուն անասնահամաճարակային իրավիճակ ապահովելու, ինչպես նաև մեղվաընտանիքների անկման պատճառները պարզելու նպատակով՝ մեղվաբուծական տնտեսություններում նոր անկած մեղուներից իրականացրել է նմուշառում՝ ինֆեկցիոն և ինվազիոն հիվանդությունների հայտնաբերման նպատակով։ Մեղվաբուծական տնտեսությունում նմուշառումներն իրականացվել են հոկտեմբերի 3-ից հոկտեմբերի 15-ը ներառյալ»,- փոխանցեց ՍԱՏՄ ներկայացուցիչը։

Հարությունյանը նշեց, որ տեսչական մարմնի կողմից մեղվաբույծների հետ իրականացվել են բացատրական-խորհրդատվական աշխատանքներ, ինչպես նաև հայտնաբերված հիվանդությունների հետագա տարածումը կանխարգելելու նպատակով համատեղ իրականացվել են մեղվաընտանիքների մշակումներ:

ՍԱՏՄ իրազեկման բաժնի պետը նաև հայտնեց, որ մյուս մարզերում էլ այս պահին անցկացվում են մշտադիտարկումներ, որոնց արդյունքները կներկայացվեն ամփոփումից հետո:

Հիշեցնենք, որ Factor TV-ն անդրադարձել էր մեղուների անկման խնդրին։ Արարատի մարզի մեղվաբույծները ահազանգել էին, որ  մեղուների մոտ անհասկանալի վարքագիծ են նկատել․ մեղուները լքել են փեթակները և չեն վերադարձել։  Ավելի վաղ՝ սեպտեմբերի 16-ին, Մեղրիի համայնքապետարանը հաղորդել էր, որ մարզի մեղվաբույծներից ահազանգեր են ստացվել մեղուների շրջանում արձանագրված անհասկանալի վարքագծի հետ կապված:

Մանյա Պողոսյան