Ձայնագրության արտահոսք․ ՆԳՆ-ն դիմել է ՔԿ, Մայր Աթոռն ասում է՝ վարկաբեկում են. ՏԵՍԱՆՅՈՒԹ

Եկեղեցի-իշխանություն հարաբերություններում լարվածությունը գնալով ավելի է խորանում։ Արագածոտնի թեմի առաջնորդ Տեր Մկրտիչ եպիսկոպոս Պռոշյանի՝ Ամենայն հայոց կաթողիկոս Գարեգին երկրորդի քրոջ որդու կալանավորումից հետո համացանցում լայն քննարկման առիթ է տվել իշխանական լրատվամիջոցներում տարածված մի հեռախոսազրույցի ձայնագրություն։ Զրույցը վերագրվում է Մայր Աթոռի Արտաքին հարաբերությունների և արարողակարգի բաժնի տնօրեն Նաթան արքեպիսկոպոս Հովհաննիսյանին և կաթողիկոսի նախկին գավազանակիր Աղան աբեղա Երնջակյանին։

Ըստ իշխանական լրատվամիջոցների՝ խոսակցությունը տեղի է ունեցել 2023 թվականի հոկտեմբերին։ Ուշագրավ է, որ շուրջ 10 րոպե տևողությամբ ձայնագրությունում Նաթան արքեպիսկոպոս Հովհաննիսյանը չի հակադարձում վեհափառի կողմից քաղաքական գործընթացներին մասնակցելու հրահանգներ տալու մասին աբեղայի պնդմանը։

Այս առիթով փորձեցինք մեկնաբանություն ստանալ Մայր Աթոռի տեղեկատվական համակարգի տնօրեն Տեր Եսայի քահանա Արթենյանից։ Նա, սակայն, մեր զանգերն անպատասխան թողեց։ Ավելի ուշ Մայր Աթոռը հաղորդագրություն տարածեց՝ չհերքելով հեռախոսազրույցի իսկությունը։

Այս ամենին նախորդել էր Արագածոտնի թեմի առաջնորդի ու դիվանապետի կալանավորումը։ Գործը հարուցվել է Հովհաննավանքի հոգևոր հովիվ Տեր Արամ քահանայի հայտարարությունների հիման վրա: Նա Հանրայինի եթերում ասել էր, որ ընդդիմության ցույցերին մասնակցել է իր կամքին հակառակ՝ վերադասի ցուցումով։ Քահանայի հայտարարությունների հիման վրա իրավապահներին հաղորդում էր ներկայացրել «Իրազեկ քաղաքացիների միավորում» ՀԿ-ն։ Կազմակերպության ծրագրերի ղեկավար Դանիել Իոաննիսյանի խոսքով՝ տարօրինակ է, որ եկեղեցին չի հերքում ընտրողներին ճնշելու մասին տեղեկությունները։

Մայր Աթոռը Արագածոտնի թեմի առաջնորդի կալանավորումից հետո ևս ծավալուն հայտարարություն տարածեց՝ պնդելով, որ իշխող քաղաքական ուժը շարունակում է լծված մնալ Հայոց եկեղեցին կազմաքանդելու ծրագրի իրագործմանը։

Դաշնակցական պատգամավոր Լիլիթ Գալստյանի խոսքով՝ իրավական գործընթացներ փնտրել պետք չէ իշխանության քայլերում։

ՔՊ-ական պատգամավոր Հասմիկ Հակոբյանն Արագածոտնի, Շիրակի ու Տավուշի թեմերի առաջնորդներին քաղբանտարկյալ չի համարում։

Խնդրի առնչությամբ հակասական են նաև քաղհասարակության գնահատականները։ Իրավապաշտպան Ժաննա Ալեքսանյանն անհերքելի է համարում փաստը, որ հոգևորականները քաղհալածյալներ են, իսկ Դանիել Իոաննիսյանը նշում է՝ դեռ ապացույցներ են անհրաժեշտ։

1937 թվականի բարքերն են․ ընդդիմադիրներն այսպես են արձագանքում հոգևորականների ազատազրկումներին և զուգահեռներ տանում Փաշինյանի ու Ստալինի կառավարման շրջանների միջև։ Փաշինյանը երեկ Factor TV-ի հարցին ի պատասխան՝ հեգնանքով խոսեց ընդդիմադիրների մեղադրանքերի մասին։

Իրավապաշտպան Ժաննա Ալեքսանյանը վստահ է՝ միջազգային զեկույցներում այս դեպքերը առանձնահատուկ են ընդգրկվելու։

Մինչ ընթանում է բանավեճ՝ հոգևորականները քաղբանտարկյալնե՞ր են, թե՞ ոչ, Գլխավոր դատախազությունից արդեն հայտնել են, որ համացանցում տարածված ձայնագրությունը վարույթի շրջանակում քննության առարկա կդառնա: Իսկ ՆԳՆ-ն հանցագործության մասին հաղորդում է ներկայացրել Քննչական կոմիտե։

Մանրամասները՝ տեսանյութում։

Նարեկ Կիրակոսյան