19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
«Կյանքի սպասվող տևողությունը հասցնենք 90 տարվա»․ կառավարությունը ֆիթնես կենտրոնների համար չափորոշիչներ կսահմանի
Հասարակություն
17.10.2025 | 16:47
Կառավարությունը ֆիթնես կենտրոնների և մարզասրահների համար չափորոշիչները կսահմանի, որոնք մշակվել են Կրթության, գիտության, մշակույթի և սպորտի նախարարության կողմից։ «Հայաստանի վերափոխման ռազմավարություն 2050»-ում նշվում է․ «Առողջ ապրելակերպը դարձնենք ազգային հատկանիշ, կյանքի սպասվող տևողությունը հասցնենք 90 տարվա»: Հենց սրանով էլ նախարարությունը պայմանավորել է նման որոշման ընդունումը։
Չափորոշիչները կսահմանվեն ֆիթնեսի տեսակ համարվող մարզական գործունեության համար։ Դրանք են՝ շեյփինգ, աէրոբիկա, զումբա, ուժային վարժություններ, մարզասարքերով վարժություններ, ջրային աէրոբիկա, մարզաառողջարարական լող, ինչպես նաև մարզական այլ գործունեության համար՝ յոգա, պիլատես, բոդիֆլեքս, ստրետչինգ:
Որոշմամբ կսահմանվի, որ ֆիթնես կենտրոնի կամ մարզասրահի պարապելու տարածքի բարձրությունը պետք է լինի 4-6 մետր: Մարզասարքերով ընդհանուր ֆիզիկական պատրաստության մարզասրահի մակերեսը կորոշվի սարքավորումների 1 միավորի (մարզասարք) համար՝ 6 քառակուսի մետր հաշվարկով։ Գետնին պառկած կամ նստած դիրքերում վարժությունների համար պետք է փռված լինի հատուկ՝ սպորտային մարզումների համար մասնագիտացված փափուկ ծածկույթ։
Ֆիթնես կենտրոններում կարող է առկա լինել նաև լողավազան, որոնք կտարանջատվեն մարզական լողի, սինքրոն լողի, ջրագնդակի, ջրացատկի և մարզաառողջարարական հատվածներով։ Ջրային աէրոբիկան պետք է իրականացվի մարզաառողջարարական տիպի լողավազաններում:
Նախագիծը հանրային քննարկման է ներկայացվել այսօր՝ հոկտեմբերի 17-ին։
Եվգենյա Համբարձումյան
