19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Փաստաբան Ալեքսանդր Կոչուբաևին կալանավորելու միջնորդություն կներկայացվի
Հասարակություն
16.10.2025 | 22:27
Փաստաբան Ալեքսանդր Կոչուբաևի նկատմամբ հանրային քրեական հետապնդում է հարուցվել Քրեական օրենսգրքի 490-րդ հոդվածի 2-րդ մասով, այսինքն՝ դատավորի, դատախազի, քննիչի մասին արատավորող, նշված անձանց իրավունքներին ու օրինական շահերին այլ վնաս պատճառող տեղեկություն հրապարակելը՝ կապված նշված անձանց օրինական ծառայողական կամ մասնագիտական գործունեության հետ: Քննիչը շուտով նաև նրան կալանավորելու միջնորդություն կներկայացնի: Այս մասին Factor TV-ի հետ զրույցում ասաց նրա փաստաբաններից Աբգար Պողոսյանը:
Կոչուբաևը մեղադրանքը չի ընդունում և համարում է, որ իր նկատմամբ հետապնդումը քաղաքական է:
Նշենք, որ նա այսօր Շենգավիթի դատարանի մոտից է դիմակավորված իրավապահների կողմից բերման ենթարկվել: Համացանցում առկա է նրան ձերբակալելու տեսանյութը, որում երևում է, որ իրավապահները նրան արգելանքի վերցնելիս պառկեցրել են գետնին:
Կոչուբաևի վերաբերյալ վարույթը նախաձեռնվել է նրա ֆեյսբուքյան գրառման համար, որում կոշտ քննադատություն և վիրավորանք է առկա քննիչների, դատավորների, դատախազների հասցեին: Սակայն գրառման մեջ որևի կոնկրետ պաշտոնատար անձի անուն նշված չէ:
Փաստաբաններից ոմանք բարձրաձայնել են այն մասին, որ, գուցե և, Կոչուբաևի գրառումը վիրավորանք պարունակում է, բայց չի պարունակում քրեորեն հետապնդելի արարք. վիրավորանքը Հայաստանում ապաքրեականացված է:
Արաքս Մամուլյան
