Արագածոտնի թեմի առաջնորդարանում հայտնաբերված գումարը կապ չունի Մկրտիչ սրբազանի մեղադրանքի հետ․ փաստաբան․ ՏԵՍԱՆՅՈՒԹ

Հայ Առաքելական եկեղեցու Արագածոտնի թեմի առաջնորդ Մկրտիչ եպիսկոպոս Պռոշյանին ներկայացված մեղադրանքի համաձայն՝ նա հոգևորականներին ասել է՝ խորհուրդ եմ տալիս՝ ում ուզում եք ընտրեք, բացի Նիկոլ Փաշինյանից: Այս մասին Factor TV-ի հետ զրուցում ասաց նրան պաշտպան Երեմ Սարգսյանը: Իսկ ինչո՞ւ է խորհուրդ տալը դիտարկվել որպես հարկադրանք. ըստ վարույթն իրականացնող մարմնի՝ գործով վկան հայտնել է, որ իր ընկալմամբ՛ խնդրանքը չկատարելը իր համար անբարենպաստ հետևանք կառաջացներ։

Երեմ Սարգսյանի խոսքով՝ Մկրտիչ եպիսկոպոս Պռոշյանին վերագրվող արարքը նախկինում քրեորեն հետապնդելի չի եղել: Այն, ինչ վերագրվում է հոգևորականին, միայն 2022-ին ուժի մեջ մտած քրեական օրենսգրքով է սահմանվել որպես հանցագործություն:

Ինչ վերաբերում է հավաքներին մասնակցելը հարկադրելու մեղադրանքին, ըստ պաշտպանի, գործում չկա որևէ նշում, թե ինչպես է դրսևորվել այդ հարկադրանքը:

Պաշտպանն ասաց՝ հոգևորականը չի ընդունել մեղադրանքը, ցուցմունք չի տվել, միայն հայտնել է, որ տեղի ունեցող գործընթացները Հայ առաքելական եկեղեցու դեմ իրականացվող արշավի մաս է:

Անդրադառնալով թեմի առաջնորդարանում հայտնաբերված գումարին և ոսկյա զարդերին՝ Երեմ Սարգսյանը նշեց, որ դրանք առհասարակ չեն հիշատակվում մեղադրանքում և կապ չունեն մեղադրանքի հետ: Նա դատապարտեց վարույթն իրականացնող մարմնի կողմից գործի հետ առնչություն չունեցող առարկաների լուսանկարները հրապարակելու վերջին շրջանում ձևավորված պրակտիկան:

Մանրամասները՝ տեսանյութում

Արաքս Մամուլյան