Արտասահմանում ապրող ներդրողը կարող է ՀՀ-ում հիփոթեքով գույք գնել հեռահար եղանակով․ Թովմասյան․ ՏԵՍԱՆՅՈՒԹ

«Քաղաքացիները հնարավորություն կունենան անշարժ գույքի առուվաճառքի և այլ պայմանագրեր կնքել և գրանցել ամբողջությամբ էլեկտրոնային եղանակով՝ առանց նոտարական վավերացման»,- այս մասին ԱԺ տնտեսական հարցերի մշտական հանձնաժողովի նիստում տեղեկացրեց Կադաստրի կոմիտեի ղեկավար Սուրեն Թովմասյանը։ Պաշտոնյայի փոխանցմամբ՝ կադաստրի կոմիտեն արդեն երկար ժամանակ իրականացնում է թվայնացման գործընթաց, որի նպատակն է ապահովել քաղաքացիների համար արագ, մատչելի և անվտանգ գործարքներ։

Նա նաև տեղեկացրեց, որ հիփոթեքային վարկավորմամբ կնքվող պայմանագրերի դեպքում ևս սպասվում են փոփոխություններ։

«Այս համակարգի ներդրմամբ մենք հնարավորություն ենք տալիս, որ քաղաքացին, ով ուզում է հիփոթեքով գույք ձեռք բերել, կարող է առուվաճառքն իրականացնել էլեկտրոնային տարբերակով։ Այս փոփոխությունները միտված են լուծելու մի քանի կարևոր խնդիրներ․ ստեղծվում են հնարավորություններ, որ Հայաստանից դուրս գտնվողները՝ արտասահմանում ապրող ներդրողը, ով ցանկանում է մեր երկրում գտնվող անշարժ գույքի շուկայում ներդրումներ անել կամ գույք ձեռքբերել, այլևս որևէ լիազորագիր տալու պահանջ չունենա։ Այսինքն՝ ներդրվում է մի համակարգ, որով արտասահմանում ապրող ներդրողը կարող է ՀՀ-ում հիփոթեքով գույք գնել հեռահար եղանակով, ինչը հիմք կհանդիսանա իրավունքի պետական գրանցման համար»,- ներկայացրեց կոմիտեի ղեկավարը։

Թովմասյանը կարևորեց, որ համակարգի ներդրմամբ քաղաքացիները կկարողանան խնայել թե՛ ժամանակ, թե՛ միջոցներ։

Մանրամասները՝ տեսանյութում։

Մանյա Պողոսյան