Ովքեր են բերման ենթարկված հոգևորականները․ Մկրտիչ սրբազանի գտնվելու վայրը, ըստ փաստաբանի, հայտնի չէ

Այսօր Արագածոտնի թեմի առաջնորդարանում Քննչական կոմիտեն խուզարկություն է իրականացրել, հայտնի է նաև, որ իրավապահները միանգամից մի քանի հոգևորականի տարել են Քննչական կոմիտե։ Փաստաբանական խմբի անդամ Արա Զոհրաբյանը հայտնել է հետևյալ անունները․ Տեր Փառեն, Տեր Մանուկ, Տեր Հայկ, Տեր Մկրտիչ, Տեր Ղևոնդ։

Փաստաբանական խմբի անդամներից Ռոման Ահարոնյանը Factor TV-ի հետ զրույցում ասաց, որ Մկրտիչ սրբազանի գտնելու վայրը հայտնի չէ։

«Քննչական խմբի անդամները ևս տեղեկություն չունեն»,- ասաց Ահարոնյանը։

Նշենք, որ հոգևորականները բերման են ենթարկվել իրենց բնակարաններում խուզարկությունից հետո։ Ըստ նախնական տեղեկությունների՝ նրանց առնչվող գործը կապված է Հովհաննավանքի հոգևոր հովիվ Տեր Արամ քահանա Ասատրյանի՝ Հանրային հեռուստաընկերությանը տված հարցազրույցում հայտնած այն տեղեկությունների հետ, որ իրեն 2021-ին ստիպել են հավաքների մասնակցել։

Ինքը՝ Տեր Արամ քահանա Ասատրյանը քիչ առաջ հայտարարություն է տարածել, որ ինքը հաղորդում չի ներկայացրել իրավապահներին, սակայն նշենք, որ  մամուլի հրապարկումը ևս կարող է քրեական վարույթ նախաձեռնելու առիթ լինել։

Մկրտիչ սրբազանի գտնվելու վայրը հայտնի չլինելու առթիվ փաստաբանական խմբի անդամ Արա Զոհրաբյանը հայտարարւթյուն է տարածել, որում, մասնավորապես, նշվում է․ «Սա Մկրտիչ սրբազանի (ավազանի անունը Հայկ Պռոշյան) իրավունքի կոպիտ խախտում է: Պետական մարմնի այս վարքագիծն առերևույթ համապատասխանում է Քրեական օենսգրքի 451 հոդվածին (բռնի անհետացումը)»:

Ըստ այդ նորմի՝

Բռնի անհետացումը՝ պետության կողմից տրված լիազորությամբ, պետության աջակցությամբ, համաձայնությամբ կամ թողտվությամբ գործող պաշտոնատար անձի, այլ անձի կամ մի խումբ անձանց կողմից ազատությունից օրինական հիմքերով կամ ապօրինի զրկված անձի ազատությունից զրկելու փաստը ժխտելը կամ թաքցնելը կամ նրա կարգավիճակի կամ գտնվելու վայրի մասին տեղեկությունը թաքցնելը, որի հետևանքով անհետացած անձը հայտնվում է օրենքի պաշտպանությունից դուրս՝

պատժվում է ազատազրկմամբ՝ երեքից յոթ տարի ժամկետով:

Հ.Գ. Բերման են ենթարկվել  նաև հետևյալ քահանաները՝

Տեր Փառեն

Տեր Մանուկ

տեր Հայկ

տեր Մկրտիչ

Տեր Ղևոնդ

Բերման են ենթարկվել նաև Արագոծոտնի թեմի աշխարհիկ աշխատակիցներ»,- հայտնել է Զոհրաբյանը։

Ավելի վաղ  Factor TV-ին Տեր Մկրտիչի գտնվելու վայրը հայտնի չլինելու մասին հայտնել է նաև  Մայր Աթոռի տեղեկատվական համակարգի տնօրեն Տեր Եսայի քահանա Արթենյանը։

 Նշենք, որ Տեր Մկրտիչը կաթողիկոս Գարեգին Բ-ի քրոջ որդին է և Արագածոտնի թեմի առաջորդը։

Արաքս Մամուլյան