Հասարակություն
15.10.2025 | 11:45«Կադաստրի կոմիտեում տևական ժամանակ է՝ իրականացվում են թվայնացման աշխատանքներ: Կադաստրի կոմիտեում թվայնացման համակարգ կներդրվի, ինչի հետևանքով գործարքները կհեշտանան»,- այս մասին ԱԺ տնտեսական հարցերի մշտական հանձնաժողովի նիստում ասաց Կադաստրի կոմիտեի ղեկավար Սուրեն Թովմասյանը՝ ներկայացնելով «Գույքի նկատմամբ իրավունքների պետական գրանցման մասին» օրենքում փոփոխություններ կատարելու մասին օրենքի նախագիծը։
Նա նշեց, որ քննարկումներ են եղել որոշակի գործիքակազմի ներդրմամբ հնարավորություն ստեղծելու, որպեսզի ինքնաշխատ էլեկտրոնային համակարգի միջոցով որոշ պայմանագրերի տեսակներ հնարավոր լինի ստորագրել ու ներկայացնել իրավունքի պետական գրանցման:
«Անշարժ գույք ունեցող յուրաքանչյուր քաղաքացի, մուտք գործելով էլեկտրոնային համակարգ և նույնականացվելով, կկարողանա մտնել իր անձնական գրասենյակ բաժինը: Անձնական գրասենյակում տեղադրված կլինեն այն պայմանագրերը, որոնք քաղաքացիները կկարողանան ստորագրել էլեկտրոնային թվային ստորագրությամբ, ինչպես նաև մուտքագրել գնորդին վերաբերող տեղեկատվությունը, որի արդյունքում գնորդը ևս կկարողանա անհրաժեշտ գործողություն կատարել»,- մանրամասնեց նա։
Ըստ Կադաստրի կոմիտեի նախագահի՝ առաջարկվող կարգավորումները նախատեսվում է գործարկել մեկուկես տարի ժամկետով՝ նպատակ ունենալով մանրամասն թեստավորելու էլեկտրոնային համակարգերը:
Մանրամասները՝ տեսանյութում։
Մանյա Պողոսյան
