01.11.2026 | 13:04
Միրզոյանն ու Եգիպտոսի ԱԳ նախարարը քննարկել են երկկողմ կապերի ընդլայնման հնարավորությունները
Թեժ խորհրդակցություն՝ ՆԳ նախարարությունում. Արփինե Սարգսյանը զգուշացրել է
Հասարակություն
15.10.2025 | 09:27
Factor TV-ի տեղեկություններով՝ Ներքին գործերի նախարարությունում երեկ խորհրդակցություն է անցկացվել, որն անցել է բավականին թեժ մթնոլորտում։
ՆԳ նախարար Արփինե Սարգսյանի հրավիրած խորհրդակցությանը մասնակցել են ոստիկանապետ Արամ Ղազարյանը, նրա տեղակալները և բոլոր բաժինների պետերը։ Խորհրդակցությունը տևել է մի քանի ժամ։ Արփինե Սարգսյանը բավական կտրուկ է խոսել ենթակաների հետ՝ ընդգծելով, որ նախարարությունը ոստիկանության համար անում է առավելագույնը, մինչդեռ հանցագործությունների կանխարգելման գործում տեսանելի արդյունքներ դեռ չկան։ Սարգսյանի խոսքով՝ ոստիկանությունն արագ բացահայտում է դեպքերը, բայց հանցագործությունների կանխումը շարունակում է մնալ ամենաթույլ օղակը։ Արփինե Սարգսյանը նաև զգուշացրել է՝ եթե նույն պատկերը շարունակվի, լուրջ փոփոխություններ կլինեն։
Factor TV-ի հետ զրույցում ՆԳ նախարարի մամուլի քարտուղար Նարեկ Սարգսյանը հաստատեց խորհրդակցության անցկացման մասին տեղեկությունը։
«Ոստիկանության ղեկավարության մասնակցությամբ կայացել է աշխատանքային խորհրդակցություն, որի ընթացքում քննարկվել են հանցավորության դեմ պայքարի հետ կապված տարբեր հարցեր»,- ասաց խոսնակը՝ այլ մանրամասներ չհայտնելով։
Այսպիսով, եթե հանցագործությունների կանխարգելման գործում տեսանելի և դրական արդյունքներ չարձանագրվեն, հնարավոր է՝ ՆԳՆ ոստիկանությունում պաշտոնանկություններ տեղի ունենան։
Նշենք նաև, որ ոստիկանապետ Արամ Ղազարյանը այդ պաշտոնում նշանակվել է այս տարվա հունիսի 3-ին, երբ առանց հստակ հիմնավորման և պարզաբանման աշխատանքից ազատվեց Արամ Հովհաննիսյանը։
Վերջին շրջանում սպանությունների մի շարք հնչեղ դեպքեր են արձանագրվել։ Մերձավանում Փարաքարի համայնքապետի ու քրեական ոստիկան Կարեն Աբրահամյանի դաժան սպանությունից հետո Նիկոլ Փաշինյանը ֆեյսբուքում գրել էր, որ կարվեն անհրաժեշտ հետևություններ, երբ մանրամասն վերլուծվի, թե կանխարգելիչ ինչպիսի՞ գործողություններ պետք է կատարվեին Փարաքարում բռնությունների շարք թույլ չտալու համար, ովքեր պիտի կատարեին այդ գործողությունները և ինչու չեն կատարել։
Մերձավանի սպանությունից հետո աշխատանքից ազատվեցին մի շարք պաշտոյաներ. Քրեական ոստիկանության Արմավիրի մարզային վարչության պետը, Արմավիրի մարզային քննչական վարչության պետը, ԱԱԾ Արմավիրի մարզային վարչության պետը և մարզի դատախազը:
Արփի Հակոբյան
