28.04.2026 | 22:13
Հայաստանի մի շարք շրջաններում էլեկտրաէներգիայի անջատումներ կլինեն
ՀՀ ԱԳ փոխնախարարը Հաագայում ներկայացրել է ՀՀ առաջնայնությունները COP17-ի անցկացման հարցում
Քաղաքականություն
14.10.2025 | 20:41
Հոկտեմբերի 14-ին Հաագա կատարած այցի շրջանակներում ՀՀ ԱԳ նախարարի տեղակալ Վահան Կոստանյանը հանդիպում է ունեցել Նիդերլանդների Թագավորության գյուղատնտեսության, ձկնորսության, սննդի անվտանգության և բնության նախարարության կենսաբազմազանության հարցերով գլխավոր տնօրեն Մարկ Ռոսկամ Աբինգի հետ: Այս մասին տեղեկացնում են ՀՀ ԱԳՆ-ից՝ ընդգծելով, որ ՀՀ ԱԳ փոխնախարարը Հաագայում ներկայացրել է ՀՀ առաջնայնությունները COP17-ի անցկացման հարցում։
«ԱԳ նախարարի տեղակալ Վահան Կոստանյանը ներկայացրել է ՀՀ առաջնայնությունները և մոտեցումները՝ 2026թ. Երևանում կայանալիք ՄԱԿ-ի Կենսաբանական բազմազանության մասին կոնվենցիայի կողմերի 17-րդ համաժողովի (COP17) և դրա արդյունավետ անցկացման հարցում:
ՀՀ ԱԳ նախարարի տեղակալն ընդգծել է համաժողովի առանցքային դերը Կունմին-Մոնրեալի կենսաբազմազանության գլոբալ շրջանակի հանձնառությունների առաջին գլոբալ վերանայման համար և այս համատեքստում կարևորել է բոլոր շահագրգիռ կողմերի ջանքերի համադրումը: Շեշտվել է, որ COP17-ի օրակարգում են լինելու ռեսուրսների մոբիլիզացման, Կոնվենցիայի կայուն ֆինանսական մեխանիզմի ձևավորման հարցերը, ինչպես նաև կենսաբազմազանությանն առնչվող որոշումների կայացման հարցերում բնիկ ժողովուրդների և տեղական համայնքների լիարժեք ներգրավվածության ապահովումը:
Զրուցակիցները մտքեր են փոխանակել Համաժողովի շրջանակներում Հայաստանի և Նիդերլանդների միջև համագործակցության հեռանկարների վերաբերյալ:
Վահան Կոստանյանը կարևորել է Կալիի հիմնադրամին ֆինանսական հատկացումների ապահովումը: Կողմերը գոհունակությամբ ընդգծել են բարձր մակարդակով տարվող ակտիվ և շարունակական քաղաքական երկխոսությունը, ռազմավարական կարևորություն ունեցող ուղղություններով արդյունավետ և զարգացող համագործակցությունը, ինչպես նաև ոլորտային փոխգործակցության ընդլայնման հեռանկարները»,- ասված է հաղորդագրությունում։
