31.10.2026 | 22:55
Հայտնաբերվել է զինծառայողի դի. ՊՆ
Արամուսում ամուսիններին սպանելու գործով ձերբակալվածը կասկածվում է ևս երկու անձի սպանելու համար
Հասարակություն
14.10.2025 | 13:08
Արամուսում ամուսինների սպանության գործով ձերբակալված անձը կասկածվում է ևս երկու անձի սպանության մեջ։ Այս մասին հայտնում են իրավապահ համակարգում Factor TV-ի աղբյուրները։
Հիշեցնենք, որ հոկտեմբերի 13-ին Աբովյան համայնքի Արամուս բնակավայրում հայտնաբերվել է կնոջ և տղամարդու դի։ Այս գործով ձերբակալվել է 61-ամյա մի տղամարդ։ Ըստ նախնական տեղեկությունների՝ նա իր անունով հաշվառված որսորդական հրացանով կրակոցներ է արձակել Արամուս գյուղի բնակիչներ՝ 64-ամյա տղամարդու ու 59-ամյա կնոջ ուղղությամբ, որոնք մահացել են։ Նախնական տեղեկությունների համաձայն՝ սպանված ամուսինները նույն օրն առավոտյան վիճաբանություն էին ունեցել ձերբակալվածի հետ։
Սրան, փաստորեն, հաջորդել է ևս երկու երիտասարդ անձի սպանություն։ Մյուս երկու անձանց դիերը հայտաբերվել են Զովաշեն գյուղում։ Սպանվածներից մեկը Աբովյանի բնակիչ Վահե Մարտիրոսյանն է, մյուսը՝ ՀՀ քաղաքացի է, իգական սեռի ներկայացուցիչ, որը, ըստ մեր տեղեկությունների՝ ՌԴ-ից էր եկել Հայաստան։ Երեկ ամբողջ օրը նրանց գտնվելու վայրն անհայտ է եղել, և միայն երեկոյան հայտնաբերվել են երիտասարդ կնոջ և տղամարդու դիերը՝ հրազենային վնասվածքներով։
Իրավապահների շրջանում քննարկվում է այն վարկածը, որ արամուսցի ամուսիններին սպանելուց հետո 61-ամյա տղամարդը փախուստի է դիմել և երիտասարդ կնոջն ու տղամարդուն կյանքից զրկել է նրանց մեքենան առևանգելու համար։
Թե իրեն վերագրվող արարքների վերաբերյալ ինչ դիրքորոշում է հայտնել ձերբակալվածը, այս պահին մեզ հայտնի չէ։
Արաքս Մամուլյան
