12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Կառուսելի ընկնելու հետևանքով հիվանդանոցում հայտնված 6-ամյա երեխան մահացել է
12.10.2025 | 23:23
Վեց օր ծայրահեղ ծանր վիճակում հիվանդանոցում գտնվելուց հետո 6-ամյա երեխան մահացել է։
Հիշեցնենք՝ հոկտեմբերի 6-ին Բյուրեղավանի 1-ին Բ թաղամասի խաղահրապարակում դժբախտ դեպք է տեղի ունեցել․ մետաղական ծանր կոնստրուկցիան շուռ է եկել 6-ամյա երեխայի գլխին։ Օրեր շարունակ բժիշկները պայքարում էին փոքրիկի կյանքի համար։
FactorTV–ն դժբախտ դեպքից հետո այցելել էր Բյուրեղավան, սակայն մինչ մենք դեպքի վայր էինք շտապում, տեղեկացանք, որ արդեն քանդել և հողին են հավասարեցրել ամբողջ խաղահրապարակը, կառուսելներն էլ տարվել են անհայտ ուղղությամբ։ Շենքի բնակիչները մեզ հետ զրույցում նշել էին, որ կառուսելները 20-30 տարի որևէ վերանորոգում կամ ուսումնասիրություն չեն տեսել։
Բյուրեղավանի համայնքապետարանից էլ Factor TV-ին հավաստիացնում էին, որ կառուսելը տեղաշարժել են 13-15 տարեկան երեխաներ, հետո այլ փոս փորել և պարզապես դրել դրա վրա։ Մեր հստակեցնող հարցին, թե ինչպես կարող էին այդ տարիքի երեխաները տեղաշարժել երկաթյա ծանր կոնստրուկցիաները, մամուլի խոսնակ Մերի Կարապետյանը կրկին հաստատող պատասխան էր տվել՝ նշելով, որ նման դեպք արձանագրվել է, իրենց պատմել են շենքի բնակիչները և լիազորը։
Խնդրել էինք նշել նաև, թե ինչու է ապամոնտաժվել խաղահրապարակը, Կարապետյանը սկզբում ասել էր, որ ծրագրով է նախատեսված եղել՝ նորը կառուցելու համար, ավելի ուշ, սակայն, հետզանգ էր կատարել և պնդել, թե ոստիկանությունն է դեպքի հաջորդ օրը եկել և ապամոնտաժել։ ՆԳՆ-ն, սակայն, հակադարձել էր համայնքապետարանին.
«Ոստիկանությունն ապամոնտաժելու որևէ գործառույթ և իրավասություն չունի։ Պարզապես այս դեպքից հետո ոստիկանությունը հորդորել է համայնքապետարանին հետագա դեպքերը բացառելու ուղղությամբ խաղահրապարակում բարեկարգում իրականացնել»,- Factor TV-ի հետ զրույցում տեղեկացրել էին ՆԳՆ լրատվական բաժնից։
Դեպքի առթիվ նախաձեռնվել է նաև քրեական վարույթ՝ անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը, որն անզգուշությամբ առաջացրել է մարդու մահ, առողջությանը ծանր վնասի պատճառում կամ այլ ծանր հետևանքի հոդվածի հատկանիշներով։ Նշանակվել է դատաբժշակական փորձաքննություն: Իրականացվում են քննչական և վարութային գործողություններ՝ դեպքի բոլոր հանգամանքները պարզելու համար։
Ռոզա Վարդանյան
