Այն, ինչ անում են Եղեռնի հուշարձանի հետ, սոսկալի է. Անահիտ Թարխանյան. ՏԵՍԱՆՅՈՒԹ

«Ջրամեկուսացման նպատակով տարվող Եղեռնի հուշարձանի վերանորոգման աշխատանքները ոչ թե նպաստելու են ջրերի մեկուսացմանը, այլ դրանք իջեցնելու են 4,5 մետր խորությամբ ներքև`հուշարձանի հիմքերի տակ: Բարբարոսաբար քանդում են հուշարձանի քարերը, աստիճանները, անունը դնում են` ջրամեկուսացում, սոսկալի է»,- Factor TV-ի հետ զրույցում ահազանգում է ճարտարապետ Անահիտ Թարխանյանը, որի հայրը` Արթուր Թարխանյանը Հայոց ցեղասպանության զոհերի հուշահամալիրի հեղինակ-ճարտարապետն է:

Նրա խոսքով` եթե աշխատանքները չդադարեցվեն, գարնանը Եղեռնի հուշարձանի շուրջ կունենանք խրամատներ`կիսով չափ լցված անձրևաջրով, ձյունով, կունենանք քանդված աստիճաններ, երկաթբետոնե մերկ, ճաքճքված մույթեր. «Ես այստեղ տեսնում եմ և´ ոչ պրոֆեսիոնալ, անգրագետ մոտեցում, և´ փողերի լվացման վտանգ: Կան մեծ ծավալների հավելագրումներ, պետությունը հուշարձանի վերանորոգման համար հինգ անգամ ավելի գումար է հատկացրել, քան պետք է: Բազմաթիվ միջազգային և տեղական օրենքներ են խախտվել: Խախտվել է նաև Արթուր Թարխանյանի հեղինակային իրավունքը, և ես` որպես նրա ժառանգ, հետևողական եմ լինելու նաև այդ հարցում: Եթե մոտ օրերս աշխատանքները չդադարեցվեն, կդիմենք դատարան»:

Անահիտ Թարխանյանի խոսքով` հուշարձանին խոշոր ծավալի վնաս է հասցվել, և նրանք, ովքեր նպաստել են դրան, պետք է քրեական պատասխանատվության ենթարկվեն. «Մեկ ամիս է` խոսում եմ հուշարձանի վտանգված լինելու մասին, պատասխանատուներն ինձ չեն հրավիրում քննարկման, խուսափում են հանդիպել ինձ հետ, վիրավորական է: Գնալու եմ «Հայնախագիծ» և պարտադրեմ, որ քննարկում կազմակերպեն»:

Մանրամասները`տեսանյութում:

Աննա Բաբաջանյան