Սերժ Սարգսյանի խափանման միջոց 30 մլն դրամ գրավը մնաց անփոփոխ, իսկ բացակայելու արգելքը՝ վերացվեց

Հակակոռուպցիոն դատարանի նախագահը մերժել է Սերժ Սարգսյանի երրորդ գործը մյուս 2 գործերին միացնելու միջնորդությունը: Այս մասին նիստի մեկնարկին հայտնեց դատավոր Գիվի Հովհաննիսյանը:

Դատարանը սկսեց նախնական դատալսումների փուլում քննարկման ենթակա հարցերի քննությունը, որոնցից մեկը մեղադրյալի խափանման միջոցի հարցն է: Երբ այս հարցի քննարկումը սկսվեց, պաշտպան Ամրամ Մակինյանը միջնորդեց գործը դռնփակ քննել, քանի որ պետք է հրապարակեն օրենքով պաշտպանվող գաղտնիք համարվող տվյալներ: Դատարանը որոշեց այս հարցը դռնփակ քննել, ուստի լրատվամիջոցների ներկայացուցիչներին ու դահլիճում գտնվող այլ անձինք դուրս եկան դահլիճից: Նիստին ավարտին միայն լրատվամիջոցները տեղեկացան, որ Սարգսյանի նկատմամբ ընտրված բացակայելու արգելք խափանման միջոցը վերացվեց, իսկ ընտրված 30 մլն դրամ գրավը մնաց անփոփոխ:

Հիշեցնենք, որ ըստ մեղադրանքի՝ Սերժ Սարգսյանը 2000 թվականից մինչև 2007 թվականը զբաղեցնելով ՀՀ պաշտպանության նախարարի, 2007 թվականի ապրիլի 4-ից մինչև 2008 թվականի փետրվարի 19-ը՝ ՀՀ վարչապետի, 2008 թվականի ապրիլի 9-ից մինչև 2018 թվականի ապրիլի 17-ը՝ ՀՀ նախագահի, իսկ 2018 թվականի ապրիլի 17-ից մինչև 2018 թվականի ապրիլի 23-ը՝ ՀՀ վարչապետի պաշտոնը, ինչպես նաև 2006 թվականից հանդիսանալով Հայաստանի Հանրապետության և Ռուսաստանի Դաշնության միջև տնտեսական համագործակցության՝ գույքային, առևտրատնտեսական, ֆինանսական հարցերի համակարգման համար 1997 թվականի հուլիսի 1-ին հիմնադրված հայ-ռուսական միջկառավարական հանձնաժողովի նախագահ, օրենքով նախատեսված արգելքին հակառակ 2006-2015 թվականների ընթացքում «ԼԼ բիմբո» ՍՊ ընկերության հիմնադիր Սեդրակ Քոչարյանի, նույն ընկերության տնօրեն Ալեքսան Որսականյանի և իր հետ մտերիմ հարաբերությունների մեջ գտնվող Միխայիլ Բաղդասարովի կողմից միջոցներ տրամադրելու և խոչընդոտները վերացնելու եղանակներով դրսևորված օժանդակությամբ մասնակցել է Միխաիլ Բաղդասարովին պատկանող, այդ թվում՝ «Միկա Լիմիթեդ» և «Աբիտ» առևտրային կազմակերպությունների կառավարմանը՝ արտոնություններ, առավելություններ տրամադրելով նշված կազմակերպություններին և հովանավորելով իրականացվող գործունեությունը, որը դրսևորվել է օտարերկրյա ներդրումներով խոշոր տնտեսական ծրագրերում ներգրավելով, բարձր ռիսկայնության պայմաններում շուրջ 14 միլիոն ԱՄՆ դոլար վարկի տրամադրմամբ, օտարերկրյա կազմակերպությունների կողմից գույքի ձեռքբերման գործընթացներում ներգրավելով և այլն:

Բացի այդ, Սերժ Սարգսյանը «ԼԼ բիմբո» ՍՊ ընկերության հիմնադիր Սեդրակ Քոչարյանի կողմից միջոցներ տրամադրելով և խոչընդոտներ վերացնելով դրսևորված օժանդակությամբ Միխաիլ Բաղդասարովի և նրա մասնակցությամբ առևտրային կազմակերպությունների օգտին իր լիազորությունների շրջանակում գործողություններ կատարելու, պաշտոնեական դիրքն օգտագործելով այդպիսի գործողությունների կատարմանը նպաստելու համար պահանջել և ստացել է առանձնապես խոշոր չափերով գույք՝ «Աբիտ» ՍՊ ընկերության 22,5 տոկոս բաժնեմասը, որը 2008 թվականի մարտի 23-ին ձևական գործարքով՝ 100.000 ՀՀ դրամով, վաճառվել է «ԼԼ բիմբո» ընկերությանը: Նա մեղադրանքը չի ընդունում:

Արաքս Մամուլյան