Սերժ Սարգսյանն է Ռոբերտ Քոչարյանին դարձրել «քաղաքական դիակ», Փաշինյանը վերակենդանացրել է՝ մեր վզին փաթաթել․ Նորայր Նորիկյան. ՏԵՍԱՆՅՈՒԹ

Նորայր Նորիկյանն արդյո՞ք «Արդար Հայաստան» կուսակցությունը լուծարելու մասին չի մտածում՝ ելնելով նաև Ռոբերտ Քոչարյանի այն հայտարարությունից, թե ՔՊ-ից բացի՝ միայն երկու ուժ շանս ունի մտնել ԱԺ՝ իրենը և Սամվել Կարապետյանինը։ Հետևաբար ստացվում է՝ «Արդար Հայաստան»-ի պես նորաստեղծ ուժերն անելիք չունե՞ն քաղաքական դաշտում, և ինչու չեն կարողացել հանրությանը համոզել, որ դուրս գան ներկա-նախկին իշխանությունների դիլեմայից, և ուշադրություն դարձնեն համեմատաբար նոր ուժերին, որոնք ոչ մեկի հետ չեն ասոցացվում։

Նորիկյանը Factor TV-ի հետ զրույցում ասում է, որ ինքը ամիսներ առաջ առաջարկել է գնալ փոքր քաղաքական ուժերի լուծարման ճանապարհով և արդյունքում ստեղծել մեկ հիմնական ուժեղ ընդդիմադիր ուժ, որն իր կարծիքով՝ կկարողանա դուրս լինել նախկին-ներկա դիլեմայից և մրցակից դաառնա ՔՊ-ին։

Նորայր Նորիկյանը նշում է, որ ներկայում ընդդիմադիր դաշտում հեգեմոն ուժերն ունեն հսկայական ֆինանսական կապիտալ, որը վերածում են քաղաքական ռեսուրսի․ «Վտանգավոր է Քոչարյանի համատեքստը՝ փող ունե՞ս, կունենաս քաղաքական ազդեցություն, կվերարտադրվես»։

«Արդար Հայաստան» կուսակցության նախագահը պնդում է, որ նախկին նախագահներն ու ներկա իշխանությունը ունեն ընդհանուր քաղաքական շահեր․ «Քոչարյանն է Փաշինյանի վերընտրվելու երաշխիքը, ապշած եմ՝ ինչպես չի հասկանում, որ իսկապես դարձել է գանձ՝ իշխանության համար։ Սերժ Սարգսյանն է Ռոբերտ Քոչարյանին դարձրել քաղաքական դիակ, Փաշինյանը վերակենդանացրել է՝ մեր վզին փաթաթել։ Նիկոլին ես քննդատում՝ իր ֆեյքային ոհմակն է հարձակվում, Քոչարյանին՝ նրանը, դաշնակից են՝ նոր ուժերի մուտքը խոչընդոտելով։ Հանե՛ք Քոչարյանին և Սերժ Սարգսյանին, թալանչիներին և հանցագործներին, տեսնեմ՝ Փաշինյանը քանի՞ ձայն կստանա։ Նիկոլ Փաշինյանը Ռոբերտ Քոչարյանի ֆոնին հրեշտակ է երևում, կրկնո՛ւմ եմ՝ հանե՛ք նախկին թալանչիներին, տեսեք՝ քանի՞ ձայն կստանա։ Քոչարյանը երանի է տալիս Փաշինյանի կառավարմանը՝ նրա ընտանիքի համար շլացուցիչ պայմաններ են բիզնեսով զբաղվելու։ Համոզված եմ՝ Քոչարյանն իր օրոք ավելի քիչ փող է աշխատել, քան՝ Փաշինյանի․ նրա արձանն էլ կկանգնեցնի, ինչո՞ւ չերկրպագի Փաշինյանին»,- ասաց Նորայր Նորիկյանը։

Հաղորդումն ամբողջությամբ՝ տեսանյութում։

Ռոբերտ Անանյան