Գլխավոր դատախազությունն ընթացք է տվել կալանավորված Արսեն Ղուկասյանի մտահոգությունների վերաբերյալ դիմումին

ՄԻՊ գրությանը Գլխավոր դատախազությունը ստացել է ՄԻՊ գրասենյակի գրությունը՝ կապված անհետ կորած զինծառայողի հորեղբայր Արսեն Ղուկասյանի մտահոգությունների հետ։ Այս մասին Factor.am-ի հարցին ի պատասխան հայտնեցին դատախազությունից։ Իրավապահ կառույցից փոխանցեցին, որ օրենքով սահմանված կարգով ընթացք են տվել գրությանը։

Հիշեցնենք, որ ՄԻՊ գրասենյակի աշխատակիցներն էին նախօրեին այցելել «Նուբարաշեն» ՔԿՀ-ում պահվող Արսեն Ղուկասյանին։ Մարդու իրավունքների պաշտպան Անահիտ Մանասյանի խորհրդական Անդրանիկ Եղոյանը երեկ Factor TV-ի հետ զրույցում ասել էր, որ Ղուկասյանը մի շարք մտահոգություններ է հայտնել, որոնք իրենք փոխանցել են ոլորտի պատասխանատուներին և Դատախազություն՝ խնդրելով քննարկել ու սեղմ ժամկետներում միջոցներ ձեռնարկել։

«Ուսումնասիրվել են Արսեն Ղուկասյանի պահման պայմանները, ընդհանուր իրավունքների ապահովման վիճակը, բժշկական օգնության և սպասարկման հետ կապված հարցերը և առանձնազրույց ենք ունեցել նրա հետ։ Ղուկասյանը ներկայացրել է մի շարք մտահոգություններ՝ պահման պայմանների, բժշկական օգնության սպասարկման, առողջական խնդիրների, կալանքը որպես խափանման միջոց կիրառելու իրավաչափության հետ կապված»,- մանրամասնել էր ՄԻՊ խորհրդականը։

Հիշեցնենք, որ Արսեն Ղուկասյանը ՊՆ շենքի հետնամասում ռազմական ոստիկանների հետ միջադեպից հետո ձերբակալվել ու մեկ ամսով կալանավորվել է՝ խուլիգանության և պաշտոնատար անձի օրինական ծառայողական գործունեությանը միջամտելու հոդվածներով։ Արսեն Ղուկասյանին կալանավորել է քաղաքական հնչեղություն ունեցող գործերով կալանքներ տված, Նոր Նորքի դատարանի դատավոր Մասիս Մելքոնյանը։ Ղուկասյանի պաշտպան Տաթևիկ Սողոյանի խոսքով՝ այդ օրը հերթապահ դատարանն Աջափնյակի նստավայրն էր, և գործն առանց պատշաճ բացատրության է մակագրվել Մասիս Մելքոնյանին։

Նշենք, որ Տաթևիկ Սողոյանն ահազանգել է, որ կալանավայրում իր պաշտպանյալի կյանքին վտանգ է սպառնում, նա պետք է սրտաբանի հսկողության տակ լինի։

Արփի Հակոբյան