15.12.2025 | 20:49
Ավտոբուսը յուղ էր վառում․ «Հայգեր»-ի վարորդը մեքենան վարել է անսարք վիճակում և չի զեկուցել. ՏԵՍԱՆՅՈՒԹ
Ալիևը հայտարարել է, որ ՀՀ-ի հետ խաղաղության համաձայնագրի նախաստորագրումը Հարավային Կովկասը կվերածի խաղաղության տարածքի
Քաղաքականություն
07.10.2025 | 13:58
Երկու ամիս առաջ Վաշինգտոնում Սպիտակ տանը Ադրբեջանի և Հայաստանի միջև խաղաղության համաձայնագրի նախաստորագրումը Հարավային Կովկասը կվերածի խաղաղության տարածքի։ Այս մասին հայտարարել է Ադրբեջանի նախագահ Իլհամ Ալիևը ադրբեջանական Գաբալայում ընթացող Թյուրքական պետությունների կազմակերպության անդամ երկրների ղեկավարների խորհրդի 12-րդ գագաթնաժողովում։
Ադրբեջանական լրատվամիջոցների հաղորդմամբ՝ նա նշել է, թե Վաշինգտոնի գագաթնաժողովի շրջանակում ԵԱՀԿ Մինսկի խմբի և դրան առնչվող կառույցների փակման վերաբերյալ համատեղ դիմումին համապատասխան՝ «անցյալի հակամարտության այդ մնացորդները նույնպես վերացվել են ԵԱՀԿ-ի սեպտեմբերի 1-ի որոշմամբ»։
Բացի այդ, Ալիևը կրկին, այսպես կոչված, «Զանգեզուրի միջանցք» եզրույթն է օգտագործել։ Նա նշել է, թե Միջին միջանցքով բեռնափոխադրումները 2022 թվականից ի վեր աճել են, և որ այդ համատեքստում Վաշինգտոնի գագաթնաժողովի մյուս կարևոր արդյունքներից մեկը «Զանգեզուրի միջանցքի» բացումն է։
«Զանգեզուրի միջանցքը մեծ նշանակություն ունի որպես նոր տրանսպորտային զարկերակ և երկրորդ երթուղի՝ ինչպես Միջին միջանցքի, այնպես էլ Հյուսիս-Հարավ միջանցքի շրջանակում»,- հավելել է Ալիևը։
Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Ալիևը, շարունակելով խեղաթյուրել փաստաթղթերի բովանդակությունը, պարբերաբար օգտագործում է «Զանգեզուրի միջանցք» տերմինը։
Թարգմանությունը՝ Էմմա Չոբանյանի
