Կան անվտանգության հարցեր, որոնց  համար ՀՀ-ն է պատասխանատու, քանի որ Արցախի անվտանգության երաշխավորն է․ Թևան Պողոսյան․ ՏԵՍԱՆՅՈՒԹ

«Մարդկային զարգացման կենտրոն» հասարակական կազմակերպության նախագահ Թևան Պողոսյանի համոզմամբ՝ արտահերթ խորհրդարանական ընտրությունների ժամանակ կարևոր է հստակ հասկանալ՝ մենք կունենանք բուն ընտրությո՞ւն, թե՞ վստահության քվե։

«Այն քաղաքական միավորները, որոնք պատրաստվում են հայտ ներկայացնել և ստանալ վստահության քվե, պետք է ներկայացնեն իրենց տեսլականն ու նաև այն քայլերը, որոնք անհրաժեշտ են այդ տեսլականին հասնելու համար։ Իրենց նախընտրական ծրագրերում պետք է նշեն, թե ի՞նչ թիմով են իրականացնելու այդ տեսլականը։ Եթե այս ամենը մեզ ներկայացնեն, և մենք քննարկումը դնենք նախընտրական ծրագրերի վրա, ապա հանրությանը կտանք այլընտրանք, իսկ այլընտրանքի պարագայում հասարակությունը կատարում է ընտրություն, իսկ երբ այդ այլընտրանքը չկա, կա ընդամենը վստահության քվե»,- ասաց Թևան Պողոսյանը։

Վերջինս հիշեցրեց «Ծառուկյան» դաշինքի և Նիկոլ Փաշինյանի միջև ստորագրված հուշագիրը՝ ընդգծելով, որ այդ հուշագիրը պետք է հիմք դառնա նախընտրական կոռեկտ քարոզչություն անցկացնելու համար։

«Ապագա Ազգային ժողովն ընտրվելու է հաջորդ հինգ տարիների  համար։ Աստված տա ֆորսմաժորային իրավիճակներ չլինեն, և մենք էլ անընդհատ արտահերթ ընտրությունների գնալու հարց չունենանք»,- ասաց Թևան Պողոսյանը։

Անդրադառնալով տարածաշրջանում տեղի ունեցող զարգացումներին, որոնք առնչվում են Հայաստանի հետ՝ Թևան Պողոսյանն ասաց, որ տարբեր երկրներ փորձում են իրենց ակտիվությունը ցուցաբերել մեր տարածաշրջանում։

«ԱՄՆ-ը խստացնում է իր քաղաքականությունն Իրանի հետ, որն առնչվում է նաև մեզ հետ։ Ռուսաստան-Թուրքիա զարգացման վեկտոր է ձևավորվել Միջին Արևելքում, որը մեզ ևս անդրադառնալու է։ Ռուսաստանն ակտիվացնում է իր շահերը իր հարևանների հետ, դա մենք պետք է կարողանանք օգտագործել։ ՀՀ-Եվրոպա համաձայնագիրը կսկսի կյանքի կոչվել ընտրություններից հետո, ուստի պետք է այստեղ էլ ցույց տանք, թե այդ բարեփոխումներն ինչպես ենք կատարելու»,- ասաց նա։

«Մարդկային զարգացման կենտրոն» ՀԿ-ի նախագահը խոսեց նաև արցախյան հիմնախնդրի մասին և շեշտեց, որ Հայաստանն ու Արցախը պետք է ներկայացնեն տարանջատում, թե որ հարցով ով պետք է խոսի։

«Կան անվտանգության հարցեր, որոնց  համար ՀՀ-ն պատասխանատու է, քանի որ Արցախի անվտանգության երաշխավորն է, հետևաբար Հայաստանը պետք է խոսի, կան հարցեր, որոնք բուն հիմնախնդրի հետ են կապված, որի մասին պետք է իսկապես Արցախը խոսի»,- ասաց Պողոսյանը:

Մանրամասները՝ տեսանյութում։