30.07.2026 | 10:25
178 մլն դրամով «Վարչաֆեստ» է կազմակերպվելու
Էրդողանը վաղը կմեկնի Ադրբեջան՝ մասնակցելու Թյուրքական պետությունների կազմակերպության գագաթնաժողովին․ Օրբանն արդեն ժամանել է
Քաղաքականություն
06.10.2025 | 15:52
Թուրքիայի նախագահ Ռեջեփ Թայիփ Էրդողանը հոկտեմբերի 7-ին կայցելի Ադրբեջան՝ մասնակցելու Գաբալայում կայանալիք Թյուրքական պետությունների կազմակերպության 12-րդ գագաթնաժողովին։ Այս մասին հայտնել է Թուրքիայի նախագահականի հաղորդակցության վարչության տնօրեն Բուրհանեթին Դուրանը X-ի իր միկրոբլոգում։
««Տարածաշրջանային խաղաղություն և անվտանգություն» թեմայով գագաթնաժողովի շրջանակում կքննարկվեն Թյուրքական պետությունների կազմակերպության ինստիտուցիոնալ կառուցվածքի ամրապնդման և կազմակերպության շրջանակում համագործակցության ամրապնդման ջանքերը, նախատեսվում է, որ կընդունվեն տարբեր փաստաթղթեր և որոշումներ, այդ թվում՝ Գաբալայի հռչակագիրը»,- ասվում է հայտարարության մեջ։
Նշվում է, որ Էրդողանը մասնակցելու է գագաթնաժողովի շրջանակում կայանալիք անդամ պետությունների ղեկավարների խորհրդի նիստին, բանակցություններ է անցկացնելու մասնակից պետությունների և կառավարությունների ղեկավարների հետ։
Հավելենք, որ չճանաչված Հյուսիսային Կիպրոսի թուրքական հանրապետության նախագահ Էրսին Թաթարն արդեն ժամանել է Ադրբեջան՝ գագաթնաժողովին մասնակցելու համար։ Բացի այդ, ադրբեջանական լրատվամիջոցները հաղորդում են, որ գագաթնաժողովին մասնակցելու համար Ադրբեջանում է նաև Հունգարիայի վարչապետ Վիկտոր Օրբանը։
Գաբալայի միջազգային օդանավակայանում պատվո պահակախումբ է շարվել նրան դիմավորելու համար։ Օրբանին օդանավակայանում դիմավորել են Ադրբեջանի մշակույթի նախարար Ադիլ Քերիմլին և այլ պաշտոնյաներ։
Թարգմանությունը՝ Էմմա Չոբանյանի
