05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Արտաքին հատուկ ծառայություններն են կանգնած Վրաստանում իշխանության տապալման կոչերի հետևում․ Վրաստանի նախագահ
Քաղաքականություն
05.10.2025 | 17:32
Վրաստանի նախագահ Միխայիլ Կավելաշվիլին մամուլի ասուլիսի ժամանակ հայտարարել է, որ երեկվա անկարգությունների ու իշխանության տապալման կոչերի հետևում կանգնած են արտաքին հատուկ ծառայությունները, և տեղի ունեցածը «անպատիժ չի մնալու»։
Հոկտեմբերի 4-ի երեկոյան բողոքի ակցիայի մասնակիցները փորձել են ներխուժել նախագահական պալատ, հայտարարելով «իշխանությունը ժողովրդին փոխանցելու» մասին։ Իրավապահները օգտագործել են հատուկ միջոցներ և ջրցան մեքենաներ՝ ցուցարարներին ցրելու համար։ Բախումների հետևանքով վնասվածքներ են ստացել 21 ոստիկան և 6 ցուցարար։ Նույն գիշեր ձերբակալվել է բողոքի ակցիայի հինգ կազմակերպիչ։
Վրաստանի հինգերորդ նախագահ Սալոմե Զուրաբիշվիլին տեղի ունեցածը սադրանք է որակել` ասելով, որ դրա ետևում կանգնած են հենց «Վրացական երազանք»-ի ներկայացուցիչները․ «Սա խաղաղ ցույցի ցրման փորձի սցենար է: Վաղն ավելի շատ մարդ կհավաքվի Ռուսթավելիում»։
Տեղի ունեցածին հայտարարությամբ արձագանքել է «Գախարիան Վրաստանի համար» կուսակցությունը` նշելով, որ դա խաղաղ ցույցի վարկաբեկում է:
«Օտարերկրյա հատուկ ծառայությունների կողմից կազմակերպված ուժերը վրաց քաղաքացիներին կոչ էին անում տապալել իշխանությունը։ Սա անպատիժ չի մնալու, հետևելու է կոշտ պատասխան»,-հայտարարել է Կավելաշվիլին։
Նախագահի խոսքով՝ վերջին օրերին վրաց հասարակությունը ականատես է եղել վանդալիզմի գործողությունների և այդպիսի կոչերի։
Ընտրությունների մասին խոսելիս Կավելաշվիլին նշել է․ «Ընտրությունները տեղի ունեցան ամենաբարձր ժողովրդավարական չափանիշներին համապատասխան, և ես ուզում եմ շնորհակալություն հայտնել Վրաստանի կենտրոնական ընտրական հանձնաժողովին»։
Հիշեցնենք՝ հոկտեմբերի 4-ին Վրաստանում կայացել են տեղական ինքնակառավարման ընտրություններ։ Քաղաքացիները քվեարկել են 64 քաղաքներում և շրջաններում՝ ընտրելով քաղաքապետերին և տեղական խորհուրդների՝ սակրեբուլոների անդամներին։
Քվեարկելու իրավունք ունեին 3 513 818 քաղաքացի, բացվել էր 3061 ընտրատեղամաս։
Ընտրություններին հետևել են 28 միջազգային և 27 տեղական կազմակերպությունների ներկայացուցիչներ։ Ընտրությունները լուսաբանել են ավելի քան 73 լրատվամիջոցներ։
