Քաղաքականություն
05.10.2025 | 13:18
Վրաստանի Կենտրոնական ընտրական հանձնաժողովի (ԿԸՀ) նախնական տվյալներով՝ իշխող «Վրացական երազանք» կուսակցության թեկնածուներն ընտրվել են Թբիլիսի, Ռուսթավի, Քութայիսի, Բաթումի և Փոթի քաղաքների քաղաքապետեր՝ քվեարկության արդյունքների 98 տոկոսի հաշվարկից հետո։
Հոկտեմբերի 4-ին, շաբաթ օրը Վրաստանում անցկացվել են տեղական ինքնակառավարման մարմինների ընտրություններ։ Ընտրողների մասնակցությունը կազմել է 40,93 տոկոս, քվեարկել է 1 438 116 քաղաքացի։ Ըստ ԿԸՀ տվյալների՝ «Վրացական երազանքն» ամբողջ երկրի մասշտաբով ստացել է ընտրողների ձայների 80,272 տոկոսը։
Մասնավորապես՝
Ռուսթավիի քաղաքապետ է դառնալու Նինո Լացաբիձեն՝ հավաքելով 91,933% (30 962 ձայն),
Քութայիսիում հաղթել է Դավիթ Էրեմեիշվիլին՝ հավաքելով 85,649% (37 635 ձայն),
Բաթումիում Գիորգի Ծինծաձեն ստացել է 80,616% (42 815 ձայն),
Փոթիում միակ թեկնածուն գործող քաղաքապետ Բեկա Վաչարաձեն էր, որը ԿԸՀ տվյալներով ստացել է 100%՝ 14 431 ձայնով։
Ինչ վերաբերում է մայրաքաղաք Թբիլիսիին՝ Կախա Կալաձեն վերընտրվել է քաղաքապետի պաշտոնում՝ հավաքելով 71,58% կամ 214 872 ձայն։
Ընտրություններն անցկացվել են երկրի 64 քաղաքներում և շրջաններում՝ քաղաքապետերի և տեղական ներկայացուցչական մարմինների՝ սակրեբուլոների անդամների ընտրության նպատակով։
Քվեարկելու իրավունք են ունեցել Վրաստանի 18 տարին լրացած 3 513 818 քաղաքացիներ։ Բացվել է 3 061 ընտրատեղամաս։
Ընտրություններին հետևել են 28 միջազգային և 27 տեղական կազմակերպությունների ներկայացուցիչներ, ինչպես նաև ավելի քան 73 լրատվամիջոց։
