Գլխավոր դատախազությունն ուսումնասիրում է Գյումրիում ՔՊ-ի կողմից ընտրակաշառք բաժանելու մասին Վարդան Ղուկասյանի հայտարարությունը

Գլխավոր դատախազությունն ուսումնասիրում է Գյումրիի քաղաքապետ Վարդան Ղուկասյանի հայտարարությունը։ Այս մասին Factor.am-ի հարցին ի պատասխան հայտնեցին իրավապահ կառույցից։

Վարդան Ղուկասյանը նախօրեին ասուլիս էր հրավիրել և պնդել, որ ՔՊ-ն Գյումրիի ավագանու ընտրություններին ընտրակաշառք է բաժանել։

«Լրագրողներդ բոլորդ տեսել եք, որ «Գծի հետև»-ում և մնացած տեղերը, խանութներ կան, որ մի մարդուն 60 հազար դրամ փող եք տվել, ամբողջ քաղաքը խոսում է ձեր ընտրակաշառք բաժանելուց։ Ամբողջ Հանրապետության ՔՊ-ականներին բերել, լցրել էիք էստեղ, ավտոբուսներով էդքան մարդ էիք կրում, ցուցակները կան, մի տան վրա 57 հոգի մարդ եք գրանցել, ո՞վ է դրանք անողը»,- ասել էր Ղուկասյանը։

Լրագրողը հետաքրքրվել էր՝ այդ փաստերը ներկայացրե՞լ է իրավապահներին։

«Երբ պետք լինի, այդ փաստերը կբարձրաձայնեմ, կտամ»,- ասել էր քաղաքապետը։

Նրա հայտարարություններին երեկ Հանրային հեռուստաընկերության եթերում պատասխանել է Գյուրմրիի ավագանու ՔՊ խմբակցության անդամ Սարիկ Մինասյանը՝ հորդորելով Գլխավոր դատախազությանը Ղուկասյանի հայտարարություններն ընդունել որպես հաղորդում հանցագործության մասին և ուսումնասիրել:

«Մեկ-երկու անգամ հայտարարություն եղել է, ես լուրջ չեմ վերաբերվել, մտածել եմ՝ քաղաքական խոսույթ է։ Առիթն օգտագործելով դիմում եմ մեր գլխավոր դատախազին՝ Վարդան Ղուկասյանի հայտարարությունն ընդունել որպես հանցագործության մասին հայտարարություն, թող կանչեն մեզ հարցաքննեն, նաև այս անգամ պարոն Ղուկասյանը կոնկրետ թաղի անուն է տվել, ասել, որ խանութում կամ խանութներում ընտրակաշառք է բաժանել, այն էլ՝ 60․000 դրամ։ Շատ հետաքրքրիր է իմանալ՝ մեր կողմնակիցներից ո՞վ է այդքան շատ ֆինանսական միջոցների տիրապետում, բացարձակ անընդունելի է ինձ համար, ես մինչև վերջ գնալու եմ, որպեսզի քրեական գործ հարուցվի։ Թող պարզեն՝ արդյոք եղել է անգամ 60 դրամի ընտրակաշառքի դեպք, եթե չէ՝ մարդիկ իրենց հայտարարությունների համար պատասխան են տալու»,- ասել էր Մինասյանը։

Արփի Հակոբյան