Մոսկվա-Բաքու հարաբերությունների լարվածության ֆոնին՝ Օվերչուկն առաջիկա օրերին Ադրբեջան կայցելի

ՌԴ փոխվարչապետ Ալեքսեյ Օվերչուկն Ադրբեջան կայցելի։ Այս մասին ադրբեջանական իշխանամերձ APA-ի մոսկովյան թղթակցին հայտնել են Ռուսաստանի դիվանագիտական ​​աղբյուրները։

Ըստ տեղեկությունների՝ Օվերչուկի այցը Բաքու նախատեսված է հոկտեմբերի 13-14-ը, դրա մանրամասները ներկայում համաձայնեցվում են։ Աղբյուրի համաձայն՝ Օվերչուկը կմասնակցի Բաքվում կայանալիք Ադրբեջանի, Ռուսաստանի և Իրանի ներկայացուցիչների եռակողմ հանդիպմանը։

Իրանական կողմից եռակողմ հանդիպմանը կմասնակցի տրանսպորտի և քաղաքաշինության նախարար Ֆարզանե Սադիղը։

Հիշեցնենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։  Ադրբեջանի գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից ադրբեջանցիների խոշտանգումների և սպանության փաստով։

Ի դեպ, Եկատերինբուրգում դեպքերից հետո Օվերչուկի հունիսի վերջին նախատեսված այցը Ադրբեջան չեղյալ էր հայտարարվել։ Ըստ ադրբեջանական աղբյուրների՝ ստեղծված իրավիճակում ադրբեջանական կողմը նպատակահարմար չէր համարել Օվերչուկի կամ այլ ռուս պաշտոնյաների այցը։

Բացի այդ, 2024 թվականի դեկտեմբերի 25-ին Ղազախստանի Ակտաու քաղաքի մոտակայքում վթարի էր ենթարկվել «Ադրբեջանական ավիաուղիների»՝ AZAL-ի J2-8243 չվերթի Embraer 190AR ուղևորատար օդանավը։ Դրանում եղել է 67 մարդ՝ 62 ուղևոր և անձնակազմի 5 անդամ։ Վթարի հետևանքով զոհվել է 38 մարդ, 29-ը՝ ողջ մնացել։ Աղետի պատճառը, ըստ ադրբեջանական կողմի, ռուսական հակաօդային հրթիռային հարվածն է եղել։

Թարգմանությունը՝ Էմմա Չոբանյանի