Արցախի նախկին պաշտոնյա Բորիս Ավագյանին մահացած են հայտնաբերել Սանկտ Պետերբուրգում ՀՀ հյուպատոսարանում

Սանկտ Պետերբուրգում ՀՀ հյուպատոսարանում մահացած են գտել Արցախի Հանրապետության նախագահի հատուկ հանձնարարությունների գծով նախկին ներկայացուցիչ Բորիս Ավագյանին, որը նախօրեին փախել էր դատարանի դահլիճից։ Այս մասին հաղորդում է 78.ru պորտալը, որին վկայակոչում է KP.ru-ն։

Ըստ աղբյուրի՝ Ավագյանը փակվել է զուգարանում և երկար ժամանակ դուրս չի եկել։ Կասկածելով, որ ինչ-որ բան այն չէ, հյուպատոսության աշխատակիցները զանգահարել են Արտակարգ իրավիճակների նախարարություն և շտապօգնություն։ Մասնագետները բացել են դուռն ու և գտել տղամարդուն՝ անգիտակից վիճակում։ Ավելի ուշ նա մահացել է։

Ավագյանը ձերբակալվել է Սանկտ Պետերբուրգում սեպտեմբերի 18-ին՝ սահմանի անօրինական հատման և փողերի լվացման մեղադրանքով։ Նախկինում նա պաշտոններ է զբաղեցրել Պետական գույքի կառավարման գործակալության Լենինգրադի մարզային գրասենյակում, աշխատել է Սանկտ Պետերբուրգի առևտրային նավահանգստի խոշորագույն մաքսային միջնորդի մոտ։ Նախօրեին Ավագյանը փախել էր Կրոնշտադտի շրջանային դատարանից։ Այնտեղից նա գնացել էր Հայաստանի հյուպատոսություն, որն իրավաբանորեն համարվում է օտարերկրյա պետություն։

Բորիս Ավագյանի մահվան հանգամանքները պարզվում են։

«Նախնական տեղեկությունների համաձայն՝ Ավագյանն ինքնասպան է եղել հյուպատոսության շենքում»,- ՌԻԱ Նովոստիին հայտնել են իրավապահ մարմիններից։

Հավելենք, որ Ավագյանը Արցախի Հանրապետության նախագահի հատուկ հանձնարարությունների գծով նախկին ներկայացուցիչն է։ Նախօրեին նա կապ էր հաստատել «Փաստինֆո»-ի հետ՝ հայտնելով, որ գտնվում է Սանկտ Պետերբուրգում ՀՀ հյուպատոսարանում։

«Վերջին 1 ամսվա ընթացքում ՌԴ հատուկ ոստիկանության աշխատակիցները ձերբակալել են, տարել ոստիկանություն, փաստաթղթեր ստուգելու, քանի որ Հայաստանը հետախուզում է հայտարարել իմ նկատմամբ։ Ես կամավոր ցանկանում եմ, որ ինձ արտահանձնեն Հայաստանին»,- ասել էր Ավագյանը։

Հայաստանում նա հետախուզվում է սահմանի անօրինական հատման և փողերի լվացման կասկածանքով։

Թարգմանությունը՝ Էմմա Չոբանյանի