Երկնագույնը հեռացվել է Թատրոնի և կինոյի պետական ինստիտուտի շենքի պատից

Թատրոնի և կինոյի պետական ինստիտուտի շենքի պատից մաքրել են Անահիտ աստվածուհու մուրալի` երկնագույն ֆոնը: Մուրալ նախագծերի հեղինակ և ղեկավար Դավիթ Խաչատրյանը Factor.am-ի հետ զրույցում պարզաբանեց, որ քաղաքապետարանի աշխատակիցների հետ քննարկման արդյունքում են հանգել այդ որոշմանը:

«Քաղաքապետարանի գործընկերների հետ խորհրդակցելուց հետո եկանք եզրակացության, որ ընտրված գույնը մի փոքր վառ է ընդհանուր գունային գամմայի տեսանկյունից և կանգ առանք այս տարբերակի վրա, որ բնական մայր տուֆն է, միաժամանակ, հանդիսանում է Անահիտ ասվածուհու ֆոնը. սա վերջնական տարբերակն է»,- ասաց Խաչատրյանը:

Նրա խոսքով՝ բացումը տեղի կունենա մի քանի օրից:

Նշենք, որ Անահիտ աստվածուհու մուրալը ստեղծելու համար նկարիչ Մինաս Հալաջյանն ԱՄՆ-ից է ժամանել Հայաստան: Նրա անավարտ ստեղծագործությունը հասցրել էր հայտնվել քննադատությունների կենտրոնում: Պատճառն աստվածուհու մուրալի երկնագույն ֆոնն էր: Ճարտարապետ Սարհատ Պետրոսյանը, օրինակ, ֆեյսբուքյան գրառմամբ հարց էր բարձրացրել՝ «ինչպե՞ս կարելի է սրբատաշ տուֆը, որը մի ամբողջ քաղաքակրթական շերտ է պարունակում, ժամանակավոր գրաֆիտիով այլանդակել»: Բացի ճարտարապետից՝ սոցիալական ցանցերի մի շարք օգտատերեր քննադատել էին նախագիծը և կարծիք հայտնել, որ այն տգեղ է, պետք է հեռացվի շենքի վրայից:

Մուրալ նախագծերի հեղինակ Դավիթ Խաչատրյանն այդ ժամանակ մեզ հետ զրույցում հակադարձել էր՝ շենքը պատմամշակութային հուշարձան չէ։ Նրա խոսքով՝ սկզբում դիտարկել էին մի քանի տարբերակ. ի սկզբանե նախատեսված էր պատը զարդարել միայն աստվածուհու կերպարով՝ առանց գունապատման։ Սակայն ԿԳՄՍ նախարարության մասնագետների հետ քննարկումից հետո որոշվել էր մուրալը դարձնել գունավոր, քանի որ 18 մետր բարձրությամբ և 10 մետր լայնությամբ պատի վրա միայն աստվածուհու պատկերն անավարտ ու դատարկ կթվար։ Ստացվում է՝ հիմա իրականացվում է ի սկզբանե առաջարկված տարբերակը․ Անահիտ աստվածուհին՝ առանց գունային զարդարման:

Հավելենք նաև, որ նախագիծը կյանքի է կոչվում բարերարների աջակցությամբ։

Արփի Հակոբյան