18.03.2026 | 23:19
1-ամյա երեխայի սպանության փորձ կատարելու մեջ մեղադրվող խորթ մայրը կալանավորվեց
Պետական համերգ՝ 224 զոհերի հիշատակի օրը․ Ադրբեջանի հարձակումից 3 տարի անց «Ֆեստիվառ» է կազմակերպվում. ՏԵՍԱՆՅՈՒԹ
Քաղաքականություն
12.09.2025 | 20:16
Երգիչ Հարութ Փամբուկչյանը գեղեցիկ, համով-հոտով համերգ է խոստանում պետության կողմից ֆինանսավորվող «Ֆեստիվառ» երաժշտական նախագծի շրջանակներում։ Առաջին հայացքից ոչ մի խնդիր, եթե չնայենք համերգի ամսաթվին՝ սեպտեմբերի 13։ 2022-ին հենց այդ օրը ադրբեջանական զինուժը Գեղարքունիքի, Վայոց Ձորի և Սյունիքի մարզերի ուղղությամբ հարձակվեց Հայաստանի ինքնիշխան տարածքի վրա։ Հայկական կողմը, ըստ պաշտոնական տվյալների, 224 զոհ տվեց, օկուպացվեցին ինքնիշխան տարածքներ։ Արյունալի մարտերից ուղիղ երեք տարի անց պետական մակարդակով և պետբյուջեի ֆինանսավորմամբ ֆեստիվառ է կազմակերպվում Հրազդանում։
«Օրվա ընտրությունը մեզ համար շատ վիրավորական է»,- ասում է զոհերից Նշան Պետրոսյանի քույրը։
Անհարգալից վերաբերմունք են համարում 2022 թվականի սեպտեմբերի 13-ի զոհերի հարազատները տարելիցի օրը տոնակատարություն կազմակերպելը։ Զոհված ժամկետային զինծառայող Նշան Պետրոսյանի քույրը՝ Աննա Պետրոսյանը, Factor TV-ի հետ զրույցում նշում է՝ այդ օրը պետք է զոհերի հիշատակը ոգեշնչող միջոցառումներ կազմակերպվեին, ոչ թե տոնական համերգներ։
Այս տարվա երեք համերգի համար պետբյուջեից միջոցառման կազմակերպիչ Հանրային ՀԸ-ին 211 մլն դրամ է հատկացվել։ Միջոցառումն անցկացվում է Ժաննա Անդրեասյանի ղեկավարած ԿԳՄՍ-ի վերահսկողությամբ։ Ինչու է պետական մակարդակով ֆինանսավորվող միջոցառումը, որին երբեմն ներկա է լինում նաև Նիկոլ Փաշինյանը, անցկացվում ռազմական գործողությունների տարելիցի օրը։ ՔՊ-ական պատգամավոր, ԱԺ ոլորտային հանձնաժողովի նախագահ Սիսակ Գաբրիելյանի ձևակերպմամբ՝ պետությունը կազմակերպչական մանր հարցերին չի միջամտել։ Օրը, ըստ պատգամավորի, Հանրային ՀԸ-ն է որոշել։
Հանրային ՀԸ-ից հրաժարվեցին մեկնաբանել, թե ինչու են որոշել տոնական համերգը կազմակերպել 224 զոհերի հիշատակի օրը։ Ընկերության գործադիր տնօրեն Հովհաննես Մովսիսյանը Factor TV-ին փոխանցեց, որ հեռախոսազանգով հարցազրույց չի տալիս։ Զինծառայողների խնդիրներով զբաղվող իրավապաշտպան Ժաննա Ալեքսանյանն իշխանության այս վերաբերմունքն անհարգալից է որակում։
Իշխանական պատգամավոր Սիսակ Գաբրիելյանը գործադիրի որոշումն այսպես է փորձում արդարացնել․ «Ցավոք սրտի, այս երեսուն տարիների ընթացքում մենք շատ ենք ունեցել այդպիսի ողբերգական դեպքերով օրեր, շաբաթներ, ամիսներ։ Ինձ թվում է՝ կապել դա մեկը մյուսին ճիշտ չէ»,- ասաց նա։
Ժաննա Ալեքսանյանը հիշեցնում է՝ իշխանությունը մարտական գործողություններից հետո խուսափում էր անգամ պատշաճ հրապարակել բոլոր զոհերի անուններն ու ազգանունները։
Ուշագրավ է, որ նախորդ տարիներին՝ սեպտեմբերի 13-ին, իշխանության ներկայացուցիչները նաև Եռաբլուր չեն այցելել, իսկ այս տարի արյունալի մարտերի տարելիցին, փաստորեն, անգամ տոնական համերգ է կազմակերպվում։
Մանրամասները՝ տեսանյութում։
Նարեկ Կիրակոսյան
