20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Բանակում ծառայությունը՝ 1,5 տարի․ ՀՀ-ն անցնո՞ւմ է պրոֆեսիոնալ բանակի. ՏԵՍԱՆՅՈՒԹ
Քաղաքականություն
11.09.2025 | 21:45
Հաջորդ տարի ամառային զորակոչից սկսած պարտադիր զինվորական ծառայության ժամկետը Հայաստանում կարող է կրճատվել։ Բանակ զորակոչվածները կծառայեն 1 ու կես տարի, եթե ԱԺ-ն ընդունի Պաշտպանության նախարարության հեղինակած նախագիծը։ Գերատեսչությունը քայլը հիմնավորում է պայմանագրային ծառայության աճով։
«Վերջին տարիներին պայմանագրային զինվորական ծառայության ընդլայնման նպատակով կատարվել են գործուն քայլեր՝ ի դեմս «Պաշտպան հայրենյաց» ծրագրի, արհեստավարժ սերժանտական համակարգի, զինծառայողների ատեստավորման համակարգի ներդրման, սահմանամերձ զորամասերում երկարամյա ծառայության զինվորական կենսաթոշակի պահպանմամբ պայմանագրային զինվորական ծառայության կազմակերպման գործընթացի, որի արդյունքները գնահատվում են դրական և միտում ունեն առավել գրավիչ դարձնել և ընդլայնել պայմանագրային զինվորական ծառայությունը: Այդ կապակցությամբ՝ նպատակահարմար է գտնվել շարքային կազմի 24-ամսյա պարտադիր զինվորական ծառայության ժամկետը 2026 թվականի ամառային զորակոչից սկսած կրճատել 6 ամսով՝ սահմանելով 18-ամսյա ժամկետով պարտադիր զինվորական ծառայություն»,- ասված է նախագծի հիմնավորման մեջ։
Factor TV-ի հարցախույզին մասնակցած քաղաքացիների մեծ մասը դրական է գնահատում նախագիծը։
Խորհրդարանական ընդդիմադիր «Պատիվ ունեմ» խմբակցության քարտուղար Տիգրան Աբրահամյանն ասում է՝ «Պաշտպան հայրենյաց» ծրագրով ծառայության ընդգրկումը որքան էլ ակտիվ լինի, պետությունը հեռու է ընդհանուր համալրվածության խնդիրների հաղթահարումից։ Պատգամավորի խոսքով՝ այս փոփոխությամբ իշխանությունը պատրաստվում է ընտրություններին։
ԱԺ խոսնակ, ՔՊ-ական Ալեն Սիմոնյանը հերքում է, թե նախագիծը քարոզչական նպատակ է հետապնդում։
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը հիշեցնում է՝ փոփոխությունը նախատեսվում էր դեռ 2021-թվականի ընտրություններից հետո։ Կառավարության 2021-2026 թվականների ծրագրում նշված է, որ «հաշվի առնելով զինվորական ծառայության զարգացման ու կատարելագործման հեռանկարները՝ առաջիկայում Կառավարությունը ձգտելու է զինծառայության ժամկետների կրճատմանը՝ ի հաշիվ պայմանագրային ծառայության աճի»։ Սաքունցն ընդգծում է՝ պայմանագրայինների հաշվին ժամկետի կրճատումը չի լուծում պրոֆեսիոնալ բանակ ունենալու խնդիրը։
Տիգրան Աբրահամյանը նշում է՝ իշխանությունն այս փոփոխությամբ նաև փորձում է ցույց տալ Ադրբեջանին, որ Հայաստանը դիմադրելու և պայքարելու որևէ նպատակ չունի:
Իրավական ակտերի նախագծերի հրապարակման միասնական կայքում նախագծին կողմ քվեարկածների թիվը մի քանի անգամ գերազանցում է դեմ քվեարկածներին։ Քվեարկությունը կտևի մինչև սեպտեմբերի 26-ը, որից հետո նախագիծը կներկայացվի գործադիրում, ընդունվելու դեպքում՝ Ազգային ժողովում։
Եթե փոփոխությունն ընդունվի օրենսդիր մարմնի կողմից, ապա 2028 թվականից ակնկալվում է բյուջետային ծախսերի նվազում։ Ի դեպ, 2026 թվականին պաշտպանության ոլորտի ֆինանսավորումը 2025-ի համեմատ կկրճատվի 39․8 մլրդ դրամով։ Ըստ այդմ՝ 2026-ին պաշտպանությանը նախատեսվում է հատկացնել 628․6 մլրդ դրամ։
Մանրամասները՝ տեսանյութում։
Արփի Հակոբյան
