16.12.2025 | 23:08
Վթար Իջևան-Երևան ավտոճանապարհին․ կան տուժածներ
ՊՆ ծախսերը 2026-ին կնվազեն մոտ 6%-ով
10.09.2025 | 19:15
2026 թվականին պաշտպանության ոլորտի ֆինանսավորումը 2025-ի համեմատ կկրճատվի 39․8 մլրդ դրամով կամ 5․9%-ով։ Այս մասին փաստում է ՀՀ 2025-2027 թվականների պետական միջնաժամկետ ծախսերի ծրագիրը։
Factor.am-ի հարցմանն ի պատասխան, թե ՊՆ-ն ինչքա՞ն գումարի բյուջետավորման հայտ է ներկայացրել 2026 թվականի համար և արդյո՞ք նախարարը համաձայնություն տվել է ծախսերի նվազեցմանը, ՀՀ պաշտպանության նախարարությունից հղում են արել միջնաժամկետ ծախսերի ծրագրին՝ նշելով, որ հայցվող տեղեկատվությունը ներկայացված է դրանում։
Ըստ այդմ՝ 2026-ին պաշտպանությանը նախատեսվում է հատկացնել 628․6 մլրդ դրամ։ Նկատենք, որ 2025-27 միջնաժամկետ ծախսերի ծրագիրը կառավարությունը հաստատել է 2024 թվականի հուլիսի 4-ին։
Հիշեցնենք, որ այսօր ԱԺ-կառավարություն հարցուպատասխանի ժամանակ վարչապետ Նիկոլ Փաշինյանը հայտարարեց, թե «վարվող քաղաքականությունը խոցելի չի դարձնում անվտանգային համակարգը, այլ հակառակը՝ բնականոն զարգացման պրոցես է»։ Ըստ նրա՝ 2025-ի բյուջեում 2024-ի համեմատությամբ պաշտպանական ծախսերի էական ու կտրուկ աճ է եղել, և այդ ծախսերի մի մասն ուղղվել է ապագա պարտավորությունների մարմանը՝ հետագա պարտքային բեռը նվազեցնելու նպատակով։ Եթե դա հանվի, հավելել է Փաշինյանը, ՊՆ ծախսերի աճը բնականոն է։
2024 թվականին պաշտպանական ծախսերին հատկացվել էր մոտ 555 մլրդ դրամ։
Գայանե Խաչատրյան
