Վարժական հավաքի մասնակիցներին ծանուցումները կուղարկվեն էլեկտրոնային տարբերակով․ ՊՆ փոխնախարար. ՏԵՍԱՆՅՈՒԹ

Վարժական հավաքներից խուսափելու համար քրեական պատասխանատվություն սահմանող հոդվածում խստացվում է մի շարք ոչ իրավաչափ հանգամանքների զուգորդմամբ վարժական հավաքներից խուսափելու համար պատասխանատվության չափը: Այս մասին ԱԺ պաշտպանության և անվտանգության հարցերի հանձնաժողովի նիստին ասաց Պաշտպանության փոխնախարար Հրաչյա Սարգսյանը՝ ներկայացնելով՝ «Ռազմական ոստիկանության մասին» օրենքում լրացումներ և փոփոխություն կատարելու մասին օրենքների նախագծերի փաթեթը։

«Խստացվում է մի շարք ոչ իրավաչափ հանգամանքների զուգորդմամբ վարժական հավաքներից խուսափելու համար պատասխանատվության չափը: Խստացվել է այն դրույթը, որ խուսափելը կատարվել է՝ իրեն մարմնական վնաս պատճառելու կամ հիվանդության սիմուլյացիայի ճանապարհով, փաստաթուղթը կեղծելու կամ խաբեության ճանապարհով»,-ասաց Սարգսյանը:

Հարցի քննարկման ժամանակ հանձնաժողովի փոխնախագահ Արմեն Խաչատրյանը, խոսելով վարժական հավաքների ժամանակ առաջած խնդիրներից, փոխանցեց, որ հանրության շրջանում դժգոհություն կա, որ հավաքին մասնակցելու ծանուցումներ են ստանում նույն մարդիկ, հիմնականում՝ բանակից նոր զորացրվածներն ու 44-օրյա պատերազմի մասնակիցները։

Փոխնախարարը պատասխանեց, որ այդ ուղղությամբ բարեփոխումներ են անում, առաջիկայում վարժական հավաքների մասնակիցները ծանուցումները կստանան էլեկտրոնային եղանակով։

«Բոլոր քաղաքացիները, որոնք ունեն հանրային ծառայության համարանիշ և ID քարտեր, էլեկտրոնային փոստ, ծանուցումներին կարող են ծանոթանալ «Ազդարար» կայքի միջոցով։ Այսինքն՝ իրենց ID-ով նույնականացնելով` կարող են ստանալ ծանուցումը։ Զինկոմիսարիատում առկա հեռախոսահամարին կուղարկվի համապատասխան հաղորդագրություն, որ ունեք ծանուցում, սակայն ծանուցման բովանդակությունը կարող եք իմանալ փոստով»,- մանրամասնեց Սարգսյանը։

Մանրամասները՝ տեսանյութում։

Մանյա Պողոսյան