07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
ԱԺ նախկին պատգամավոր Ռուբիկ Հակոբյանն ազատ արձակվեց
Հասարակություն
27.08.2025 | 16:55
Ազգային ժողովի նախկին պատգամավոր Ռուբիկ Հակոբյանը քիչ առաջ ազատ արձակվեց դատարանի նիստերի դահլիճում։ Նման որոշում կայացրեց Հակոբյանի գործը քննող դատավոր Դավիթ Արղամանյանը։
Նշենք, որ Ռուբիկ Հակոբյանը ձերբակալվել է 2025 թվականի հուլիսի 18-ին, ապա, դատարանի որոշմամբ, կալանավորվել։ Նրան մեղադրանք է ներկայացվել իշխանությունը զավթելու հրապարակային կոչ հնչեցնելու համար։ Վարույթի առիթը հուլիսի 1-ին Հայկական երկրորդ հեռուսաալիքին տված հարցազրույցի մասին է:
Ըստ մեղադրանքի՝ «Ռուբիկ Կարապետի Հակոբյանը, երկար տարիներ հանդիսանալով ՀՀ ազգային ժողովի պատգամավոր, իրական ազդեցություն ունենալով անձանց լայն շրջանակի վրա, համաձայն չլինելով ներքաղաքական հարցերի վերաբերյալ ՀՀ կառավարության դիրքորոշումների հետ, 2025թվականի հուլիսի 1-ին զանգվածային լրատվության միջոցով՝ Հ2 հեռուստատեսության յութուբյան ալիքի «Խոսքի իրավունք» հաղորդաշարին հարցազրույց տալու ընթացքում հնչեցրել է իշխանությունը զավթելուն ուղղված հրապարակային կոչ»։
Այսօր գործով նախնական դատալսումներ էին, որի ընթացքում քննության առարկա դարձավ նաև Հակոբյանի խափանման միջոցի հարցը։ Մեղադրանքի կողմը միջնորդեց երկարացնել Հակոբյանի կալանքի ժամկետը, իսկ պաշտպանական կողմը՝ վերացնել կալանքը։ Արդյունքում, դատավորը որոշեց վերացնել ընդդիմադիր գործչի նկատմամբ ընտրված խափանման միջոց կալանքը։
Միաժամանակ, դատարանը մերժեց Ռուբիկ Հակոբյանի նկատմամբ քրեական հետապնդումը դադարեցնելու մասին պաշպանական կողմի միջնորդությունը։
Արաքս Մամուլյան
