«Պարզեցումների ենք գնալու ոչ միայն Հայաստան-Ադրբեջան սահմանային կետերում, այլև սահմանային բոլոր կետերում»,- այս մասին Կառավարության նիստից հետո լրագրողների հետ ճեպազրույցում հայտարարեց ՀՀ վարչապետ Նիկոլ Փաշինյանը։ Ըստ կառավարության ղեկավարի՝ նման քաղաքականություն են որդեգրել, որպեսզի բիզնես միջավայրը, արտահանումը, ներմուծումը, տարանցումը հնարավորինս լինեն պարզեցված։
«Վաշինգտոնի հռչակագրում հստակ արձանագրված են այն հինգ սկզբունքները, որոնց հիման վրա գործում է այս համաձայնությունը՝ տարածքային ամբողջականություն, ինքնիշխանություն, իրավազորություն, սահմանների անխախտելիություն և փոխադարձություն։ «Խաղաղության խաչմերուկ»-ի ներկայացման ժամանակ մենք արդեն ասել ենք, որ պատրաստ ենք պարզեցումների այս սկզբունքների հիամն վրա»,- նշեց նա։
Փաշինյանն՝ անդրադառնալով հարցին, թե արդյոք ադրբեջանցիները Հայաստանի սահմանն անցնելու դեպքում հայ սահմանապահների տեսնելո՞ւ են, թե ոչ, պատասխանեց․ «Աշխարհի բազմաթիվ զարգացած երկրներում մաքսային և սահմանային հսկողության այն ձևերը, որ մեզ ծանոթ են տասնամյակների ընթացքում արդեն գոյություն չունեն, մասնավորապես՝ կենսաչափական անձնագրերի կիրառման պարագայում գործում են բոլորովին նոր ընթացակարգեր, նաև թվային տեխնոլոգիաների զարգացման տրամաբանությամբ գործում են այլ ընթացակարգեր, և այն ձևերը, որ մարդկանց պետք է ձեռք տալ, շոշափել և այլն, այդ ձևերը բոլոր երկրներում, այդ թվում Հայաստանի բոլոր սահմաններում 5,10,15 տարի հետո չեն լինելու, և մենք գնալու ենք պարզեցումների»։
Մանրամասները՝ տեսանյութում։
Մանյա Պողոսյան
