Երևանում նոր ներկրվող տրանսպորտային միջոցներին համապատասխան տեխնիկական սպասարկման կայան կկառուցվի

Երևան համայնք նոր ներկրվող տրանսպորտային միջոցներին համապատասխան տեխնիկական սպասարկման կայան կկառուցվի։ Հարցն ընդգրկված է կառավարության այսօրվա նիստի չզեկուցվող հարցերի փաթեթում։

Կառավարության հիմնավորման մեջ նշվում է, որ քաղաքային էլեկտրատրանսպորտի զարգացման, նոր տրոլեյբուսների և էլեկտրաբուսների ներկրմամբ պայմանավորված՝ անհրաժեշտ է ստեղծել նոր ներկրվող տրանսպորտային միջոցներին համապատասխան տեխնիկական սպասարկման կայան։

Այս ամենը հաշվի առնելով՝ կառավարությունում մշակվել են Շենգավիթ վարչական շրջանի Բագրատունյաց 44 հասցեում գտնվող «Երևանի Էլեկտրոտրանսպորտ» ՓԲԸ մասնաշենքերի հիմնանորոգման աշխատանքների նախագծանախահաշվային փաստաթղթերը՝ համաձայն որոնց նախահաշվային արժեքը կազմում է 1,157,901.1 հազար դրամ։ Նշվում է, որ հիմնանորոգման աշխատանքների ծրագրի ընդհանուր արժեքը կազմում է 955,276.5 հազար դրամ, որից Շենգավիթ վարչական շրջանի Բագրատունյաց 44 հասցեում գտնվող «Երևանի Էլեկտրոտրանսպորտ» ՓԲԸ մասնաշենքերի հիմնանորոգման աշխատանքների արժեքը, ըստ կնքված պայմանագրերի կազմում է 936,870.0 հազար դրամ։

Հիմնանորոգման աշխատանքների որակի տեխնիկական հսկողության ծառայությաան արժեքը կազմում է11,900.0 հազար դրամ, իսկ հեղինակային հսկողության ծառայություն համար՝ 6,506.5 հազար դրամ:

Կառավարության ներկայացրած հիմնավորման մեջ նշվում է, որ «Երևանի Էլեկտրատրանսպորտ» ՓԲԸ շարժակազմի հավաքակայանի վարչական և վերանորոգման մասնաշենքերի հիմնանորոգման աշխատանքների ծրագրի ֆինանսավորումը նախատեսվում է իրականացնել Երևան քաղաքում գտնվող պետական սեփականություն համարվող անշարժ գույքի, իրավաբանական անձանց կանոնադրական կապիտալում պետական մասնակցության, այդ թվում՝ անավարտ շինարարության օբյեկտների մասնավորեցումից ստացված միջոցների շրջանակում։

Տեղեկացնենք, որ «Երևանի Էլեկտրատրանսպորտ» ՓԲԸ վարչական մասնաշենքը կառուցվել է 1950-ական թվականներին և առ այսօր չի հիմնանորոգվել, շինությունները գտնվում են անմխիթար վիճակում:

Վարչական շենքի արտաքին սալիկապատումը մասամբ քայքայվել և թափվել է և այն թողնում է կիսավեր շինության տպավորություն, որը նաև վտանգ է ներկայացնում մարդկանց համար:

Ըստ կառավարության՝ ներկայացված նախագիծը խթանում է տնտեսական ակտիվությունը և նպաստում նոր աշխատատեղերի ստեղծմանը։ Շինարարական աշխատանքների ընթացքում կստեղծվեն բազմաթիվ ժամանակավոր աշխատատեղեր։