12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Գյումրիում կտեղադրվի պատմաբան Կարո Սասունու արձանը
Մշակույթ
16.08.2025 | 13:49
Գյումրիում կտեղադրվի հասարակական-քաղաքական գործիչ, պատմաբան, գրականագետ, հրապարակախոս և հրատարակիչ Կարո Սասունու արձանը։ «Արմենպրես»-ի թղթակցի փոխանցմամբ՝ Գյումրիի ավագանու որոշմամբ՝ 2 մետր 40 սանտիմետր բարձրությամբ բրոնզաձույլ արձանը կտեղադրվի քաղաքի Պռոշյան և Գարեգին Նժդեհի փողոցների խաչմերուկում։ Արձանի հեղինակն է քանդակագործ Միսակ Մելքոնյանը։
Արձանի տեղադրման նախաձեռնությունը պատկանում է «Զորավար Սեպուհ» պատմաքաղաքական վերլուծական կենտրոնի նախագահ, պատմական գիտությունների դոկտոր, Երևանի պետական համալսարանի Հայոց պատմության ամբիոնի պրոֆեսոր Աշոտ Ներսիսյանին և Կարո Սասունու ժառանգներին։
«Կումայրի» պատմամշակութային արգելոց-թանգարանի տնօրեն Ինգա Ավագյանը, ավագանուն ներկայացնելով Կարո Սասունու կենսագրությունը, նշեց, որ 1914–1915 թվականներին վերջինս մասնակցել է հայ ազգի փրկությանը, մասնավորապես՝ Թալինում՝ Դաշտադեմի ամրոցի կռվին։ 1919 թվականին նա ընտրվել է Հայաստանի Առաջին Հանրապետության խորհրդարանի անդամ, իսկ 1920-ին նշանակվել է Ալեքսանդրապոլի նահանգապետ։
«Նահանգապետ դառնալով՝ առաջինը պայքար նախաձեռնեց կոռուպցիայի դեմ և շատ կարճ ժամանակում կարողացավ վերջ տալ այդ երևույթին։ Ի՞նչ էր անում նա. ձերբակալում էր և՛ տվողներին, և՛ վերցնողներին։ Առավել խիստ էր հենց կաշառք տվողների նկատմամբ», – ընդգծեց Ինգա Ավագյանը։
