04.06.2026 | 13:46
Ղրիմում ուկրաինական հարձակումների հետևանքով զոհվել է 4, վիրավորվել՝ 10 մարդ
Հայաստանում գործազրկության մակարդակը նվազել է․ աշխատանք փնտրողների մեջ առաջին տեղում 35-44 տարիքային խումբն է
Հասարակություն
12.08.2025 | 14:21
Հայաստանում 2025-ի առաջին եռամսյակում գործազրկության մակարդակը նվազել է՝ կազմելով 14% նախորդ տարվա 15,5%-ի փոխարեն։ Աճել են աշխատուժի մասնակցության և զբաղվածության ցուցանիշները՝ հասնելով համապատասխանաբար 58,2% և 50,1% (նախորդ տարի՝ 57,7% և 48,7%)։ Այս մասին Factor.am-ը տեղեկանում է ՀՀ վիճակագրական կոմիտեից։
Բացարձակ թվերով գործազուրկների թիվը նվազել է 204.4 հազարից մինչև 188.2 հազար, որից 102.8 հազարը տղամարդիկ են, 85.4 հազարը՝ կանայք։
Պաշտոնապես գրանցված գործազուրկների թիվը 2025 թվականի հունիսի վերջի դրությամբ 36 654 է։ Նրանցից 22 185-ը կանայք են, 14 469-ը՝ տղամարդիկ։ Պաշտոնապես գրանցված գործազուրկների թիվը գրեթե հավասար է ինչպես քաղաքային (18 561), այնպես էլ գյուղական (18 093) համայնքներում։
Նրանց թվում ամենաշատը 35–44 տարեկաններն են՝ 12 244 քաղաքացի։ Հաջորդում են 45–54 տարեկանները՝ շուրջ 8 079 մարդ, և 55-ից բարձր տարիքի քաղաքացիները՝ 6 110։ 16–34 տարեկանների շրջանում գործազրկության մակարդակը համեմատաբար ցածր է։
Հայաստանում աշխատանք է փնտրում 9 891 երիտասարդ (16–29 տարեկան), ամենաշատը՝ Արարատի և Կոտայքի մարզերում։
2024-2025թթ. առաջին եռամսյակի տվյալները նախնական են: Ներկայացվող ցուցանիշները վերաբերում են հետազոտության արդյունքներով գնահատված 15-74 տարեկան ՀՀ մշտական (ռեզիդենտ) բնակչությանը, ովքեր հետազոտության պահին.
– զբաղված են եղել ՀՀ-ում գտնվող ռեզիդենտ տնտեսական միավորում, կամ ՀՀ-ից դուրս՝ ոչ ռեզիդենտ տնտեսական միավորում (ազգային զբաղվածության ցուցանիշ), որի վերաբերյալ պարզաբանումներ ներկայացված են «Աշխատանքի շուկան Հայաստանում, 2024» վիճակագրական ժողովածուի «Աշխատանքային գործունեություն. Զբաղվածություն» բաժնում.
– գործազուրկ են եղել՝ աշխատանք չեն ունեցել և աշխատանք են փնտրել ՀՀ-ում և (կամ) ՀՀ-ից դուրս (ազգային գործազրկության ցուցանիշ),
– չեն եղել զբաղված կամ գործազուրկ՝ դուրս են եղել աշխատուժից (ազգային ցուցանիշ):
Անի Թամրազյան
