Հայաստանն Ադրբեջանին «միջանցք» է տրամադրում, որի վրա իր ինքնիշխանությունը սահմանափակված է․ Արթուր Խաչատրյան

Մինչ իշխանությունը Վաշինգտոնում եռակողմ հանդիպման արդյունքներով ստորագրված համատեղ  հռչակագիրը «հաղթանակ» ու «պատմական» է որակում, խորհրդարանական ընդդիմությունն այն «հերթական զիջողականությունն» է համարում։

Ընդդիմադիր «Հայաստան» խմբակցության պատգամավոր Արթուր Խաչատրյանը բացասական է գնահատում  ոչ միայն Վաշինգտոնում Թրամփի, Փաշինյանի և Ալիևի ստորագրած  հռչակագիրը, այլև կառավարման 7 տարվա ընթացքում  Փաշինյան-Ալիև  ցանկացած պայմանավորվածություն։ Ըստ նրա՝  իր կառավարման ընթացքում Փաշինյանն արտաքին քաղաքական ոլորտում որևէ ձեռքբերում չի արձանագրել։

Ընդդիմադիր պատգամավորի պնդմամբ՝ Հայաստանն Ադրբեջանին տրամադրում է «միջանցք», որի վրա ՀՀ-ի ինքնիշխանությունը սահմանափակված է, փոխարենն Ադրբեջանից ոչինչ չի ստանում։

«Ադրբեջանը փոխադարձության սկզբունքի հիման վրա չի ասում՝ մենք էլ ձեզ ենք  ճանապարհ տրամադրում։ Սա բացառապես զիջում է։ Ադրբեջանը շահեկան վիճակում դուրս եկավ, որովհետև ստացավ «միջանցք», 907 հոդվածը չեղարկեց։  Ադրբեջանի պահանջով ՀՀ-ն և Ադրբեջանը դիմեցին, որպեսզի ԵԱՀԿ Մինսկի խումբը լուծարվի։ Թող ասեն, թե ինչ իրավական ռեժիմ է գործելու այդ ճանապարհի վրա»,-   Factor.am-ի հետ զրույցում ասաց Խաչատրյանը։

Դիտարկմանը, որ վաշինգտոնյան հանդիպումը  հաջողություն է համարվում, որվհետև Ադրբեջանը ճանաչում է  Հայաստանի տարածքային ամբողջականությունը և «Թրամփի ուղին» գործելու է ՀՀ-ի ինքնիշխանության և իրավազորության  ներքո,  Խաչատրյանն ընդգծեց․ «Ուրեմն,  այդ մանիպուլյատորներին ասեմ, որ Ադրբեջանը Հայաստանի տարածքային ամբողջականությունը ճանաչել է դեռևս 1992  թվականի ձմռանը, երբ ՀՀ-ն  Հայաստանն ու Ադրբեջանն անդամակցել են ՄԱԿ-ին, երբ անդամակցել են Եվրոպական խորհրդին։ Սակայն, դա չի խանգարում, որ Ադրբեջանը օկուպացնի ՀՀ տարածքից մոտ  250  քառակուսի կմ հատված»,- նկատեց նա։

Հիշեցրինք, որ այս հարցն, ըստ իշխանությունների,  սահմանազատման ընթացքում է լուծվելու, Խաչատրյանն արձագանքեց․ «Իշխանություններն այդ հայտարարությունն  անում էին նաև նախորդ տարի, բայց սահմանազատման ընթացքում ՀՀ տարածքից որևէ միլիմետրով Ադրբեջանը դուրս չի եկել։ Եթե ասում են, որ դա սահմանազատման ընթացքում է լուծվելու, այս դեպքում այս թղթի արդյունքը ո՞րն է»։

Բացի այս, Խաչատրյանի խոսքով, խաղաղության պայմանագրի նախաստորագրումն իրավական ուժ չունեցող փաստաթուղթ է։

Հիշեցնենք, որ ԱՄՆ նախագահ Դոնալդ Թրամփը, ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրել են յոթ կետից բաղկացած համատեղ հռչակագիր, որը ամրագրում է կողմերի խաղաղության ձգտումը, ինրպես նաև ստեղծվում է «Թրամփի ուղի» կոչվող նախագիծը, որով  ՀՀ-ն ապաշրջափակվում է, Ադրբեջանը  ՀՀ-ի տարածքով միանում է իր էքսկլավ Նախիջևանի Ինքնավար Հանրապետության հետ։ Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը, որի տեքստը կհրապարակվի այսօր երեկոյան։ 

Մանյա Պողոսյան