Հասարակություն
08.08.2025 | 12:30
Երևանի քաղաքապետարանը 1 պայմանագրով միանգամից 3 միջոցառման կազմակերպման ծառայություն է գնել Ալվարդ Հովհաննիսյան Նորիկի Ա/Ձ-ից։ 3 միջոցառումներն էլ կազմակերպվելու են Աջափնյակ վարչական շրջանի համար, ընդհանուր վճարվելու է 3 մլն 4,666 դրամ։
Գիտելիքի օրվա՝ սեպտեմբերի 1-ի կապակցությամբ նախատեսվում է վարչական շրջանի ղեկավարի աշխատակազմի ներկայացուցիչների կողմից վարչական շրջանի 45 ուսումնական հաստատություններին հանձնել գիտելիքի օրվան նվիրված ուղերձներ՝ թղթապանակներով, նվիրել 45 հատ ծաղկեփունջ՝ յուրաքանչյուրը 17 հատ կարմիր վարդից, 25 հատ փայտյա լաքապատ ՀՀ զինանշան։
ՀՀ անկախության օրվա կապակցությամբ ձեռնարկատերը պետք է համերգ կազմակերպի Թումոյի այգում՝ բարձրակարգ հայկական երաժշտական բենդի, ժողովրդական 2 երգչի և ճանաչված հանդիսավարի մասնակցությամբ։
Ուշագրավ է Ուսուցչի օրվա կապակցությամբ նախատեսվող միջոցառման համար ընտրված վայրը՝ Երևանից ոչ հեռու գտնվող գինու, կոնյակի գործարան։ Թե կոնկրետ որ գործարանի մասին է խոսքը, պայմանագրում նշված չէ։ Վարչական շրջանի ղեկավարի կողմից գործարանում կկազմակերպվի էքսկուրսիա, որի ժամանակ Աջափնյակի ուսումնական կենտրոնների 60 ղեկավարներ կծանոթանան գինու արտադրության ընթացքին, ապա կմասնակցեն համտես-հյուրասիրությանը, որի ժամանակ կմատուցվեն կոնյակներ, չոր գինիներ, տարատեսակ խորտիկներ, միրգ, խմորեղեն։
Գայանե Խաչատրյան
